وزیر اعظم محمد شہباز شریف کی ازبکستان کے صدر شوکت مرزیوئیف سے ملاقات، دونوں ممالک کے مابین کثیرالجہتی سطحوں پر جاری مضبوط تعاون پر اظہاراطمینان

جمعہ 4 جولائی 2025 22:32

خانکندی (اُردو پوائنٹ اخبارتازہ ترین - اے پی پی۔ 04 جولائی2025ء) وزیر اعظم محمد شہباز شریف اور ازبکستان کے صدر شوکت مرزیوئیف نے پاکستان اور ازبکستان کے مابین دوطرفہ اور کثیرالجہتی سطحوں پر جاری مضبوط تعاون پر اطمینان کا اظہار کرتے ہوئے تجارت اور سرمایہ کاری، باہمی روابط، توانائی، علاقائی سلامتی، ثقافت اور عوامی تبادلوں سمیت مختلف شعبوں میں تعاون بڑھانے پر اتفاق کیاہے۔

دونوں رہنمائوں نے پاکستان اور ازبکستان کے درمیان دیرینہ برادرانہ تعاون کو مزید گہرا اور متنوع بنانے کے عزم کا اعادہ کیا۔جمعہ کو وزیراعظم آفس کے میڈیا ونگ سے جاری کردہ بیان کے مطابق وزیر اعظم محمد شہباز شریف نے ازبکستان کے صدر شوکت مرزیوئیف سے آذربائیجان کے شہر خانکندی میں 17ویں ای سی او سربراہی اجلاس کے موقع پر ملاقات کی۔

(جاری ہے)

دونوں رہنمائوں نے پاکستان اور ازبکستان کے مابین دوطرفہ اور کثیرالجہتی سطحوں پر جاری مضبوط تعاون پر اطمینان کا اظہار کیا۔

وزیر اعظم اور ازبک صدر نے دونوں ممالک کے درمیان ثقافتی، تہذیبی اور تاریخی تعلقات پر زور دیا جو متعدد شعبوں میں مضبوط شراکت داری کی ٹھوس بنیاد فراہم کرتے ہیں۔ دونوں رہنمائوں نے تجارت اور سرمایہ کاری، باہمی روابط، توانائی، علاقائی سلامتی، ثقافت اور عوامی تبادلوں سمیت مختلف شعبوں میں تعاون بڑھانے پر اتفاق کیا۔ملاقات کے دوران، دونوں رہنمائوں نے علاقائی روابط کے منصوبوں خاص طور پر ٹرانس افغان ریلوے منصوبے کی اہمیت پر زور دیا۔

اس مقصد کے لیے وزیر اعظم شہباز شریف اور ازبک صدر نے معاہدوں کو حتمی شکل دینے کے لیے اپنے سینئر وزراء کے تاشقند اور اسلام آباد کے دوروں پر اتفاق کیا۔دونوں رہنمائوں نے پاکستان اور ازبکستان کے درمیان دیرینہ برادرانہ تعاون کو مزید گہرا اور متنوع بنانے کے عزم کا اعادہ کیا۔ دونوں رہنمائوں نے مشترکہ دلچسپی کے علاقائی اور عالمی مسائل پر بھی باہمی نقطہ نظر کا تبادلہ کیا۔