خالد حسین مگسی کی وفاقی وزراء کے ہمراہ این ڈی ایم اے ہیڈکوارٹر آمد ، ملک بھر میں ہنگامی حالات اور آفات سے نمٹنے میں ادارے کیکردار پر بریفنگ

ہفتہ 5 جولائی 2025 18:42

اسلام آباد (اُردو پوائنٹ اخبارتازہ ترین - این این آئی۔ 05 جولائی2025ء)وفاقی وزیر برائے سائنس و ٹیکنالوجی، خالد حسین مگسی نے آج معزز وفاقی وزراء کے ہمراہ نیشنل ڈیزاسٹر مینجمنٹ اتھارٹی (این ڈی ایم ای) کے ہیڈکوارٹر، اسلام آباد کا دورہ کیا۔ اس موقع پر چیئرمین این ڈی ایم اے لیفٹیننٹ جنرل انعام حیدر ملک نے وزراء کو ملک بھر میں ہنگامی حالات اور آفات سے نمٹنے میں ادارے کے کثیر الجہتی کردار پر بریفنگ دی۔

چیئرمین این ڈی ایم اے نے پاکستان میں بدلتے ہوئے موسمی حالات اور آفات سے نمٹنے کے لیے قومی سطح پر تیاری، رابطہ کاری اور فوری ردِعمل کو مؤثر بنانے کی اتھارٹی کی فعال کوششوں پر روشنی ڈالی۔ انہوں نے ایک جامع ڈیزاسٹر رسک مینجمنٹ فریم ورک اپنانے کی ضرورت پر زور دیا تاکہ موسمیاتی تبدیلیوں سے پیدا ہونے والے بڑھتے ہوئے چیلنجز کا مؤثر انداز میں مقابلہ کیا جا سکے۔

(جاری ہے)

اس موقع پر وفاقی وزیر خالد حسین مگسی نے وزیرِاعظم محمد شہباز شریف کے وژن کے تحت این ڈی ایم اے کی مؤثر کارکردگی کو سراہا۔ انہوں نے ادارے کو جدید خطوط پر استوار کرنے اور اسے بین الاقوامی معیار کی ڈیزاسٹر مینجمنٹ ایجنسیز کے طرز پر استوار کرنے کی اہمیت پر زور دیا۔وفاقی وزیر نے کہا کہ آفات سے متعلق مسائل کو قومی و علاقائی سطح پر زیادہ مؤثر انداز میں حل کرنے کے لیے صوبائی ڈیزاسٹر مینجمنٹ اتھارٹیز (پی ڈی ایم ایز) کے ساتھ روابط اور تعاون کو مزید مضبوط بنانے کی اشد ضرورت ہے۔وفاقی وزیر نے این ڈی ایم اے کی کاوشوں کو سراہا اور آفات سے بروقت اور مربوط انداز میں نمٹنے کے لیے ادارہ جاتی صلاحیت کو مضبوط بنانے کے حکومتی عزم کا اعادہ کیا۔