عالمی امن وسلامتی کیلئے پاکستان کی کاوشیں لائق تحسین ہیں، وزیراطلاعات مظہرسعید شاہ

پیر 7 جولائی 2025 23:44

مظفر آباد (اُردو پوائنٹ اخبارتازہ ترین - اے پی پی۔ 07 جولائی2025ء) وزیراطلاعات آزادحکومت ریاست جموں وکشمیر پیر محمد مظہر سعید شاہ نے کہا ہے کہ پاکستان کا اقوام متحدہ میں سلامتی کونسل کی صدارت سنبھالنا اہل کشمیر کے لیے باعث فخر ہے، عالمی امن وسلامتی کیلئے پاکستان کی کاوشیں لائق تحسین ہیں، پاکستان نے ہمیشہ ایک ذمہ دار اور امن پسند ملک ہونے کا ثبوت دیا ہے۔

کشمیری عوام کی امیدوں و امنگوں کا مرکز پاکستان ہے، کشمیری ہمیشہ پاکستان کی سلامتی ، ترقی اور استحکام کیلئے دعاگو رہتے ہیں۔ اپنے ایک بیان میں وزیراطلاعات پیر محمد مظہرسعید شاہ نےکہاکہ سلامتی کونسل کی صدارت ایک علامتی مگر اسٹریٹجک کردار ہے جو ایک نہایت حساس اور پیچیدہ عالمی ماحول میں پاکستان کے حصے میں آیا ہے۔

(جاری ہے)

انہوں نے کہاکہ اس منصب کی حیثیت غیر معمولی ہے، پاکستان کی صدارت کو ایک امید بھری نگاہ سے دیکھا جا رہا ہے۔

پاکستان کو سلامتی کونسل کی صدارت کے ذریعے فلسطین اور کشمیر جیسے دیرینہ مسائل کو عالمی ضمیر کے سامنے پیش کرنے کا سنہری موقع ملا ہے۔ انہوں نے کہاکہ مسئلہ کشمیر کے حل کیلئے پاکستان نے ہمیشہ کشمیری عوام کی خواہشات اور اقوام متحدہ کی قراردادوں کے مطابق حل کی بات کی ہے جبکہ بھارت نے ہمیشہ کشمیریوں کو دبانے کیلئے طاقت کا استعمال کیا ہے اور بین الاقوامی دنیا کی آنکھوں میں دھول جھونک کوتحریک آزادی کشمیر کو دبانے کی ناکام کوشش کی ہے ۔ انہوں نے کہاکہ دنیا جان لے کہ اس خطے میں پائیدار امن کے لیے مسئلہ کشمیر کا کشمیری عوام کی خواہشات کے مطابق حل ناگزیر ہے ۔