یوٹیلیٹی اسٹورز کارپوریشن آف پاکستان کے سکھر زون کے ملازمین کا احتجاجی مظاہرہ

پیر 7 جولائی 2025 21:10

سکھر(اُردو پوائنٹ اخبارتازہ ترین - این این آئی۔ 07 جولائی2025ء)یوٹیلیٹی اسٹورز کارپوریشن آف پاکستان کے سکھر زون کے ملازمین کی بڑی تعداد نے کانٹریکٹ اور ڈیلی ویجز ملازمین کو تنخواہ ادا نہ کرنے کے خلاف آل پاکستان نیشنل ورکر یونین سی بی اے کے مرکزی نائب صدر عبدالقیوم برڑو کی سربراہی میں زونل و ریجنل آفس سکھر میں احتجاجی مظاہرہ کیا اور مطالبات کے حصول کیلئے شدید و نعریبازی کی ، اس موقع پر ملازمین سے خطاب کے دوران مرکزی رہنما عبدالقیوم برڑو نے کانٹریکٹ اور ڈیلی ویجز ملازمین کو تنخواہ ادا نہ کرنے پر اپنے شدید غصے کا اظہار کرتے ہوئے کہا کہ یوٹیلٹی اسٹورز کارپوریشن کی منیجمینٹ این آئی آر سی کورٹ کے واضح آرڈرز کے باوجود کانٹریکٹ و ڈیلی ویجز ملازمین کو تنخواہیں نہیں دی رہی ہے جو سراسر ظلم و زیادتی اور توہین عدالت ہے ، تنخواہ کی عدم ادائیگی کی وجہ سے ملازمین کے گھروں میں نوبت فاقہ کشی تک جا پہنچی ہے اور ملازمین شدید پریشانی میںمبتلا ہیں انہوں نے مطالبہ کیا کہ کانٹریکٹ اور ڈیلی ویجز ملازمین کو فوری تنخواہ ادا کرتے ہوئے معطل کئے جانے والے ملازمین کو عدالتی احکامات پر جوائنگ آرڈر دیئے جائے بصورت دیگر متعلقہ محکمے کے افسران کے خلاف اسلام آباد ڈی چوک پر دھرنا دیا جائیگا جس کی تمام تر ذمہ داری انتظامیہ پر عائد ہو گی ، واضع رہے کہ کانٹریکٹ اور ڈیلی ویجز ملازمین کو تنخواہ ادا نہ کرنے کے خلاف معطل کئے جانے والے ملازمین کو جوائنگ آرڈر نہ دینے پر سندھ کے مختلف شہروں میں بھی یوٹلیٹی ملازمین کا احتجاجی سلسلہ جاری ہے ۔