غزہ میں دماغی سوجن کی بیماری پھیلنے کا خطرہ بڑھ چکا ہے،عالمی ادارہ صحت

غزہ(اُردو پوائنٹ اخبارتازہ ترین - این این آئی۔ 08 جولائی2025ء)عالمی ادارہ صحت (ڈبلیو ایچ او)اور بین الاقوامی تنظیم ڈاکٹرز وِدآئوٹ بارڈرز نے خبردار کیا ہے کہ غزہ میں 21 ماہ سے جاری اسرائیلی جنگ کے نتیجے میں دماغی سوجن کی بیماری کے پھیلنے کا خطرہ بڑھ چکا ہے۔عرب ٹی وی کے مطابق فلسطینی علاقوں میں عالمی ادارہ صحت کے نمائندہ رِک پیپرکورن نے کہا کہ ہم بچوں میں دماغی انفیکشن (میننجائٹس)اور گردن توڑ بخار کے بڑھتے ہوئے کیسز پر بہت فکرمند ہیں۔

عالمی ادارہ صحت نے خبردار کیا کہ ہوا سے پھیلنے والا بیکٹیریائی میننجائٹس جان لیوا ثابت ہو سکتا ہے اور وہ خیمہ بستیوں میں آسانی سے پھیل سکتا ہے جبکہ وائرل میننجائٹس، جو نسبتا کم خطرناک ہے، اس کے ناقص صفائی والے پناہ گزین کیمپوں میں تیزی سے پھیلنے کا خدشہ ہے۔

(جاری ہے)

عام طور پر غزہ میں جون سے اگست کے دوران وائرل میننجائٹس کے کیسز میں موسمی اضافہ ہوتا ہے لیکن اس بار ناقص صفائی، ناکافی طبی سہولیات اور بچوں کی ویکسی نیشن میں تعطل جیسے اضافی عوامل بھی بیماری کے پھیلا کا سبب بن رہے ہیں۔

غزہ میں جو ہسپتال ابھی فعال ہیں وہ مریضوں سے بھرے ہوئے ہیں اور بنیادی اینٹی بائیوٹکس ادویات کی شدید قلت کا سامنا کر رہے ہیں۔غزہ میں ڈاکٹرز وِدآئوٹ بارڈرز کے نائب طبی رابط کار ڈاکٹر محمد ابو مغیصیب کے مطابق ہسپتالوں میں نہ بیڈ دستیاب ہیں اور نہ الگ تھلگ رکھنے کی گنجائش ہے۔ انہوں نے کہا کہ بیکٹیریا کی شناخت کے لئیضروری ٹیسٹ اور خون کے نمونوں کی دستیاب سہولت نہ ہونے کے باعث درست تشخیص میں بھی مشکلات پیش آ رہی ہیں۔

ناصر ہسپتال خان یونس میں بچوں اور زچگی کے شعبے کے سربراہ ڈاکٹر احمد الفرا کے مطابق گزشتہ ہفتے وائرل اور بیکٹیریائی میننجائٹس کے 40 کیس سامنے آئے۔ اقوام متحدہ کے دفتر برائے انسانی امور کی رپورٹ کے مطابق شمالی غزہ کے شہر میں واقع الرنتیسی بچوں کے ہسپتال میں گزشتہ چند ہفتوں کے دوران سینکڑوں کیس رپورٹ ہوئے ہیں۔امدادی کارکنوں کا کہنا تھا کہ غزہ میں بچوں کے درمیان اس خطرناک مرض کے کیسز میں تیزی سے اضافہ ہوا ہے۔

جنوبی غزہ کے الناصر ہسپتال میں 16 ماہ کی شام نامی بچی ان متعدد بچوں میں شامل ہے جن میں دماغی انفیکشن (میننجائٹس) کی تشخیص ہوئی ہے۔ بچی کی دادی ام یاسمین نے بتایا کہ شام کو اچانک تیز بخار ہوا اور اس کا جسم اکڑ گیا ، اس وقت ہمیں کوئی ایمبولینس یا گاڑی نہیں ملی اور ہم اسے بے حد مشکل سے علاج کے ہسپتال تک پہنچا سکے۔