Live Updates

وفاقی وزیرِ خزانہ کی پاکستان بزنس کونسل کے وفد کی ملاقات میں پالیسی سازی میں مشاورتی عمل کے تسلسل کی یقین دہانی

بدھ 9 جولائی 2025 16:51

اسلام آباد (اُردو پوائنٹ اخبارتازہ ترین - اے پی پی۔ 09 جولائی2025ء) وفاقی وزیر خزانہ سینیٹر محمد اورنگزیب سے پاکستان بزنس کونسل کے وفدنے سی ای او احسن ملک اور نامزد سی ای او جاوید قریشی نے ملاقات کی ۔وزارت خزانہ سے جاری بیان کے مطابق وزیرِ خزانہ نے کونسل میں قیادت کی تبدیلی کا خیرمقدم کیا اور نئی ٹیم کو مکمل تعاون کی یقین دہانی کراتے ہوئے کہا کہ حکومت کاروباری برادری کے اہم اسٹیک ہولڈرز کے ساتھ مشاورت پر مبنی پالیسی سازی کے عمل کو مسلسل جاری رکھنا چاہتی ہے۔

وزیر خزانہ نے پاکستان بزنس کونسل کے مثبت کردار کو سراہا، خاص طور پر پالیسی معاملات میں اس کے تحقیقی کام اور مختلف شعبوں سے متعلق ڈیٹا کو نہایت مفید قرار دیا جو وقتاً فوقتاً حکومت کے ساتھ شیئر کیا جاتا ہے۔

(جاری ہے)

سینیٹر محمد اورنگزیب نے وفد کو آگاہ کیا کہ حکومت نے پالیسی سازی کو مزید مؤثر اور مربوط بنانے کے لیے ٹیکس پالیسی آفس کو ایف بی آر سے نکال کر وزارتِ خزانہ میں منتقل کر دیا ہے تاکہ پاکستان بزنس کونسل جیسے فورمز کے ساتھ مشاورت کے ادارہ جاتی عمل کو فروغ دیا جا سکے۔

وزیر خزانہ نے کہا کہ حکومت کاروباری و صنعتی طبقے کی آرا اور تجاویز کو نہایت اہمیت دیتی ہے، اور اسی وژن کے تحت وفاقی بجٹ 2025-26 کے لئے مشاورتی عمل کا آغاز اس سال غیر معمولی طور پر جلد کر دیا گیا تاکہ مختلف چیمبرز، تجارتی تنظیموں اور کاروباری فورمز سے موصول ہونے والی تجاویز پر تفصیل سے غور کیا جا سکے اور انہیں بجٹ سازی میں بہتر طور پر شامل کیا جا سکے۔