وفاقی محتسب ریجنل ہیڈ سکھر کی جانب سے خیرپور میں کھلی کچہری منعقد ، متاثر شہریوں کو موقع پر رلیف دیا گیا

بدھ 9 جولائی 2025 17:15

سکھر (اُردو پوائنٹ اخبارتازہ ترین - اے پی پی۔ 09 جولائی2025ء) وفاقی محتسب ریجنل سیکریٹریٹ سکھر کی جانب سے خیرپور میں اوور بلنگ، سیپکو، سوشل ویلفیئر و دیگر اداروں کے خلاف شکایات کی سماعت 160 سے زائد درخواستوں پر کارروائی کی گئی ۔ وفاقی محتسب اعلیٰ اعجاز احمد قریشی کی ہدایت پر وفاقی محتسب سیکریٹریٹ، ریجنل آفس سکھر کی جانب سے چیف مانیٹرنگ آفیسر کے دفتر خیرپور میں عوامی شکایات کی سماعت کے لیے "آؤٹ ریچ کمپلینٹ ہیرنگ" کا انعقاد کیا گیا۔

سماعت کے موقع پر 160 سے زائد عوامی درخواستوں پر کارروائی کی گئی، جن میں سے 100 سے زائد درخواستوں کا موقع پر ازالہ کیا گیا۔ریجنل آفس سکھر کے ایسوسی ایٹ ایڈوائزر ڈاکٹر عبدالوحید ایندھڑ نے میڈیا سے گفتگو کرتے ہوئے بتایا کہ اس کھلی کچہری میں سیپکو کی اوور بلنگ، ڈِیڈکشن، یوٹیلیٹی اسٹورز، سوئی گیس، شاہ عبداللطیف یونیورسٹی، ریڈیو پاکستان، پاکستان انجینئرنگ کونسل، پاکستان بیت المال سمیت دیگر اداروں سے متعلق شکایات سنی گئیں۔

(جاری ہے)

انہوں نے بتایا کہ 10 لاکھ روپے سے زائد کا ریلیف موقع پر ہی متاثرہ شہریوں کو فراہم کیا گیا۔سیپکو کے ایس ڈی او محمد عزیر خان، سیپکو رانی پور کے ایس ڈی او ثناء اللہ جامڑو، وفاقی محتسب اعلیٰ کے نمائندہ انفعاخان، ڈپٹی ڈائریکٹر انفارمیشن سید ساجد حسین شاہ اور دیگر متعلقہ اداروں کے افسران موجود تھے ۔ ریجنل آفس سکھر کے ایسوسی ایٹ ایڈوائزر ڈاکٹر عبدالوحید ایندھڑ کا کہنا تھا کہ عوام کو ان کے اپنے علاقوں میں ریلیف فراہم کرنے کے لیے ریجنل آفس سکھر کی جانب سے مختلف اضلاع میں کھلی کچہریوں کا انعقاد کیا جا رہا ہے تاکہ شہریوں کو سکھر آنے کی ضرورت نہ پڑے۔

ایک سوال کے جواب میں انہوں نے کہا کہ سرکاری افسران کے خلاف موصول ہونے والی شکایات پر رپورٹس اسلام آباد ہیڈ آفس کو بھیجی جاتی ہیں جہاں سے قانونی کارروائی عمل میں آتی ہے۔ان کا مزید کہنا تھا کہ سیپکو، نادرا، قومی بینک اور مختلف تعلیمی اداروں سے متعلق شکایات مسلسل موصول ہو رہی ہیں، جن پر فوری کارروائی کر کے عوام کو ریلیف دیا جا رہا ہے۔