Live Updates

لاہور سمیت بیشتر اضلاع میںآئندہ 24 گھنٹوں کے دوران مزید بارشوں کا سلسلہ 13 جولائی تک جاری رہنے کی توقع ہے، محکمہ موسمیات

بدھ 9 جولائی 2025 17:56

لاہور (اُردو پوائنٹ اخبارتازہ ترین - اے پی پی۔ 09 جولائی2025ء) صوبائی دارالحکومت لاہور سمیت بیشتر اضلاع میںآئندہ 24 گھنٹوں کے دوران مزید بارشوں کا سلسلہ 13 جولائی تک جاری رہنے کی توقع ہے۔ محکمہ موسمیات کے مطابق گزشتہ روز صوبائی دارالحکومت لاہور سمیت قصور ،خانیوال، ساہیوال،اوکاڑہ ، منڈی بہائوالدین،ٹوبہ ٹیک سنگھ ، خوشاب ،گوجرانولہ، ننکانہ صاحب ، چنیوٹ، فیصل آباد، بہاولپور،گجرات ،قصور،بہاولنگر، سرگودھا، ملتان اور جھنگ میں موسلا دھار بارش ریکارڈ کی گئی۔

ترجمان پی ڈی ایم اے کے مطابق آئندہ 24 گھنٹوں میں پنجاب کے بیشتر علاقوں لاہور ،گجرات، گوجرانوالہ، حافظ آباد، سیالکوٹ، نارووال، شیخوپورہ، قصور، منڈی بہائوالدین، اوکاڑہ ، ساہیوال، جھنگ، ٹوبہ ٹیک سنگھ، ننکانہ صاحب، چنیوٹ، فیصل آباد ،خوشاب، سرگودھا، میانوالی اور بھکر میں تیز ہوائوں اور گرج چمک کے ساتھ بارش جبکہ شمال مشر قی پنجاب کے چند مقامات میں موسلادھار بارش کا امکان ہے ۔

(جاری ہے)

ڈی جی پی ڈی ایم اے عرفان علی کاٹھیا نے کہا ہے کہ شہری احتیاطی تدابیر اختیار کرتے ہوئے آسمانی بجلی کی گرج چمک کے دوران محفوظ مقامات پر رہیں ، کچے اور خستہ حال مکانات و عمارتوں میں ہر گز نہ رہیں،بارش کے دوران گاڑی کی رفتار آہستہ رکھیں اور مناسب فاصلے پر رہیں جبکہ کس بھی ایمرجنسی کی صورتحال میں پی ڈی ایم اے ہیلپ لائن 1129 پر رابطہ کریں۔.