جس آڈٹ رپورٹ کا ڈھنڈورا پی ٹی آئی والے پیٹ رہے وہ بزدار اورپرویز الٰہی دورکی ہے‘عظمیٰ بخاری

بدھ 9 جولائی 2025 22:43

لاہور (اُردو پوائنٹ اخبارتازہ ترین - این این آئی۔ 09 جولائی2025ء) وزیر اطلاعات پنجاب عظمی بخاری نے تحریک انصاف کے رہنما بیرسٹر سیف کے حالیہ بیان پر شدید ردعمل دیتے ہوئے کہا ہے کہ مسٹر جعلی دانشور آڈٹ رپورٹ کو غور سے پڑھیں، اس میں آپ کی قیادت کا کچا چھٹا درج ہے۔انہوں نے کہا کہ پی ٹی آئی جن اعداد و شمار کو بنیاد بنا کر پروپیگنڈہ کر رہی ہے، وہ دراصل بزدار اور پرویز الٰہی کے دور کی آڈٹ رپورٹ ہے۔

صفحہ نمبر 87اور 96پڑھ لیں، شاید تھوڑی شرم آ جائے۔ وزیر اطلاعات پنجاب نے واضح کیا کہ جس 10 کھرب روپے کی کرپشن کا شور مچایا جا رہا ہے، وہ درحقیقت 2018ء سے 2023ء کے دوران گندم کی خریداری اور سبسڈی سے متعلق ہے اور اس عرصے میں پنجاب میں حکومت کس کی تھی، یہ پوری قوم بخوبی جانتی ہے۔

(جاری ہے)

انہوں نے مزید کہا کہ پی ٹی آئی کا چار سالہ دور پنجاب کی تاریخ کا سیاہ ترین باب ہے، جہاں کرپشن، نااہلی اور لوٹ مار نے ہر شعبے کو متاثر کیا۔

جو لوٹ مار گزشتہ 12سال سے خیبرپختونخوا میں جاری تھی، وہی ماڈل چار سال پنجاب میں بھی نافذ کیا گیا۔عظمیٰ بخاری نے کہا کہ ان چار برسوں میں بشریٰ بی بی اور فرح گوگی کی کرپشن بھی ریکارڈ کا حصہ بن چکی ہے۔ انہوں نے مزید کہا کہ شریف فیملی کے بغض میں ان کا لیڈر وزیراعظم ہائوس سے ڈائری اٹھا کر سیدھا اڈیالہ جا پہنچا۔آخر میں انہوں نے کہا کہ علی امین گنڈاپور اور بیرسٹر سیف جیسے کرداروں کا انجام بھی ’’نیکسٹ سٹاپ اڈیالہ‘‘واضح نظر آ رہا ہے۔