وزیر اعلیٰ خیبر پختونخوا کی زیر صدارت شمالی و جنوبی وزیرستان سمیت ضم اضلا ع میں امن وامان کی صورتحال پر ایک اعلیٰ سطحی اجلاس

بدھ 9 جولائی 2025 23:15

پشاور (اُردو پوائنٹ اخبارتازہ ترین - آن لائن۔ 09 جولائی2025ء)وزیر اعلیٰ خیبر پختونخوا علی امین خان گنڈاپور کی زیر صدارت شمالی و جنوبی وزیرستان سمیت ضم اضلا ع میں امن وامان کی صورتحال پر ایک اعلیٰ سطحی اجلاس وزیر اعلیٰ ہاؤس پشاور میں منعقد ہوا جس میں دہشت گردی کے خاتمے کیلئے تمام مکاتبِ فکر اور عوام کا مشترکہ اور متفقہن لائحہ عمل بنانے کا فیصلہ کیا گیا ہے اور اس مقصد کیلئے آل پارٹیز کانفرنس بُلانے کا بھی فیصلہ ہوا ہے۔

کانفرنس میں شرکت کیلئے تمام سیاسی جماعتوں کے پارلیمنٹری لیڈرز کو دعوت نامے ارسال کئے جائیں گے۔ اجلاس میں حکومتی نمائندہ وفدتشکیل دینے کا بھی فیصلہ ہوا ہے جو تمام علاقوں کا دورہ کرکے عوامی مشاورت کے سلسلے کو مزید تیز کریگا۔ اجلاس میں متعلقہ صوبائی کابینہ اراکین اور اعلیٰ سرکاری حکام بھی شریک ہوئے۔

(جاری ہے)

وزیر اعلیٰ نے اجلاس سے اپنے خطاب میں کہا کہ وقت کا تقاضا ہے کہ سیاست سے بالاتر ہوکر تمام سیاسی جماعتیں ایک پلیٹ فارم سے امن وامان کے قیام کے لئے مشترکہ لائحہ عمل اپنائیں اور عوامی نمائندے یک زبان ہوکر دہشت گردی کے خاتمے کی حکمت عملی کا اطلاق یقینی بنائیں۔

وزیر اعلیٰ نے مزید کہا کہ معنی خیز اقدامات ،باہمی مشاورت اور متفقہ فیصلوں کے ذریعے ہی دائمی امنن قائم ہوسکتا ہے۔