سینٹ کٹس اینڈ نیوس میں پاکستان کے پہلے ایلچی نے گورنر جنرل کو اسناد پیش کر دیں

جمعرات 10 جولائی 2025 20:07

باسیتیر(اُردو پوائنٹ اخبارتازہ ترین - این این آئی۔ 10 جولائی2025ء)پاکستان کے ہائی کمشنر محمد سلیم نے کریبیئن ملک سینٹ کرسٹوفر (سینٹ کٹس) اینڈ نیوس کی فیڈریشن کی گورنر جنرل ڈیم مارسیلا اے لیبرڈ کو اپنی سفارتی اسناد پیش کر دیں۔ گورنمنٹ ہاس میں منعقدہ باضابطہ تقریب میں پاکستانی ہائی کمشنر محمد سلیم نے پاکستانی قیادت اور عوام کی طرف سے گورنر جنرل اور سینٹ کٹس اینڈ نیوس کے عوام کو نیک خواہشات کا پیغام دیا۔

انہوں نے سینٹ کٹس اینڈ نیوس کے ساتھ متحرک اور مستقبل کے حوالے سے تعلقات کو فروغ دینے کے لیے پاکستان کے عزم کا اعادہ کیا اور بہتر تعاون کے باہمی فائدے پر زور دیا۔کینیڈا کے دارالحکومت اوٹاوا میں مقیم پاکستانی ہائی کمشنر محمد سلیم کو بیک وقت سینٹ کٹس اینڈ نیوس میں پاکستان کے نان ریذیڈنٹ ہائی کمشنر کے طور پر تسلیم کیا گیا ہے۔

(جاری ہے)

پاکستان اور سینٹ کٹس اینڈ نیوس کے درمیان سفارتی تعلقات جنوری 2024 میں قائم ہوئے تھے۔

پاکستانی ہائی کمشنر محمد سلیم پاکستان کے پہلے ایلچی ہیں جنہیں فیڈریشن میں تعینات کیا گیا ہے۔ انہوں نے نئے قائم ہونے والے سفارتی تعلقات کو مضبوط بنانے اور سیاسی، تجارتی، سرمایہ کاری، ترقی اور سیاحت سمیت مختلف شعبوں میں تعاون پر مبنی شراکت داری قائم کرنے کے لیے پاکستان کی خواہش کا اظہار کیا۔اسناد کی پیشکشی دونوں ممالک کے درمیان تعلقات میں ایک تاریخی سنگ میل کی نشاندہی کرتی ہے اور آنے والے سالوں میں گہرے تعاون کی راہ ہموار کرتی ہے۔