پی آئی اے کا بعد از حج آپریشن کامیابی کے ساتھ مکمل، آخری پرواز رات آٹھ بجکر 30 منٹ پر مدینہ سے اسلام آباد پہنچی

جمعرات 10 جولائی 2025 22:30

اسلام آباد (اُردو پوائنٹ اخبارتازہ ترین - اے پی پی۔ 10 جولائی2025ء) حجاج کرام کو وطن واپس پہنچانے کے لئے پاکستان انٹرنیشنل ایئر لائن (پی آئی اے) کا بعد از حج آپریشن جمعرات کو مکمل ہو گیا، پی آئی اے کی آخری بعد از حج پرواز رات آٹھ بجکر 30 منٹ پر مدینہ سے اسلام آباد پہنچ گئی۔ پی آئی اے کے ترجمان عبداللہ حفیظ خان کی طرف سے جاری بیان کے مطابق پی آئی اے کی بعد از حج 147 پروازوں کے ذریعے مجموعی طور پر 41،500 سے زائد حجاج کرام وطن واپس پہنچے ہیں ۔

(جاری ہے)

پی آئی اے کی حج پروازوں کی شیڈول پر روانگی کا تناسب 90 فیصد سے زائد رہا۔ پی آئی اے کا حج آپریشن کراچی لاہور، اسلام آباد، کوئٹہ، ملتان اور پشاور سے آپریٹ ہوا ۔حج آپریشن کے لئے پی آئی اے نے بوئنگ 777 اور ایئربس 320 طیارے استعمال کئے۔ ترجمان نے کہا کہ پی آئی اے کا بعد از حج آپریشن 10 جون کو شروع ہوا تھا اور 10 جولائی کو مکمل ہوگیا ہے، حجاج کرام نے پی آئی اے کی جانب سے کئے گئے اقدامات پر اطمینان کا اظہار کیا ہے ۔ ترجمان نے کہا کہ پی آئی اے کے چیف ایگزیکٹو آفیسر ایئر وائس مارشل عامر حیات نے حج آپریشن میں شامل ٹیموں کو کامیاب حج آپریشن پر مبارکباد دی ہے۔