Live Updates

پنجاب، شمال مشرقی و جنوبی بلوچستان، بالائی خیبر پختونخوا، گلگت بلتستان اور کشمیر میں بعض مقامات پر تیز ہواؤں اور گرج چمک کے ساتھ بارش کی توقع ہے، محکمہ موسمیات

جمعہ 11 جولائی 2025 21:05

اسلام آباد (اُردو پوائنٹ اخبارتازہ ترین - اے پی پی۔ 11 جولائی2025ء) آئندہ چوبیس گھنٹوں کے دوران پنجاب، شمال مشرقی و جنوبی بلوچستان، بالائی خیبر پختونخوا، گلگت بلتستان اور کشمیر میں بعض مقامات پر تیز ہواؤں اور گرج چمک کے ساتھ بارش کی توقع ہے، اس دوران بالائی خیبر پختونخوا، جنوبی پنجاب اور شمالی بلوچستان میں چند مقامات پر تیز /موسلادھار بارش جبکہ ملک کے بیشتر علاقوں میں موسم گرم اور مرطوب رہنے کا امکان ہے۔

محکمہ موسمیات کے مطابق گذشتہ 24 گھنٹے کے دوران وسطی/شمال مشرقی پنجاب، بالائی خیبر پختونخوا، شمال مشرقی بلوچستان، کشمیر اور گلگت بلتستان میں تیز ہواؤں اور گرج چمک کے ساتھ بارش جبکہ چند مقامات پر مو سلادھار بارش بھی ہوئی جبکہ ملک کے دیگر علاقوں میں موسم گرم اور مرطوب رہا۔

(جاری ہے)

سب سے زیادہ بارش بہاولنگر (شہر 25، ایئرپورٹ ایک)، مری اور بہاولپور ایئرپورٹ ایک، خضدار 23، قلات 03، لسبیلہ ایک، پاراچنار 18، لوئر دیر 13، سیدو شریف اور تخت بائی 8، پٹن 3، کوٹلی 9، گلگت 3، سکردو 2 اور ہنزہ میں ایک ملی میٹر بارش ریکارڈ کی گئی۔

جمعہ کو ریکارڈ کئے گئے زیادہ سے زیادہ درجہ حرارت کے اعدادوشمار کے مطابق نوکنڈی اور دالبندین میں درجہ حرارت 46، روہڑی، خیرپور، دادو، موہنجو داڑو، سکھر، تربت اور پنجگور میں 41 ڈگری سینٹی گریڈ ریکارڈ کیا گیا۔ محکمہ موسمیات نے کہا ہے کہ جمعہ کی رات کو موسلادھار بارش کے باعث ڈی جی خان، بارکھان، کوہلو، موسی خیل، کشمیر، مری، کوہستان، چترال، دیر، سوات اور شانگلہ کے مقامی / برساتی ندی نالوں میں طغیانی کا خدشہ ہے۔ اس دوران خیبر پختونخوا کے پہاڑی علاقوں، مری، گلیات، کشمیر اور گلگت بلتستان میں لینڈ سلائیڈنگ کے باعث ٹریفک کی آمدورفت بھی متاثر ہونے کا خطرہ ہے۔