Live Updates

این ڈی ایم اے کا 17 جولائی تک بارشوں اور ممکنہ سیلاب کے خطرے کے حوالے سے الرٹ جاری

جمعہ 11 جولائی 2025 23:50

اسلام آباد (اُردو پوائنٹ اخبارتازہ ترین - اے پی پی۔ 11 جولائی2025ء) نیشنل ڈیزاسٹر مینجمنٹ اتھارٹی(این ڈی ایم اے) نے ملک کے مختلف علاقوں میں 17 جولائی تک بارشوں اور ممکنہ سیلاب کے خطرے کے حوالے سے الرٹ جاری کردیا۔ تمام متعلقہ اداروں کو کسی بھی ممکنہ ہنگامی صورتحال سے نمٹنے کے لیے پیشگی اقدامات کو یقینی بنانے کی ہدایت کی گئی ہے۔ ترجمان این ڈی ایم اے کے مطابق پنجاب کے اضلاع بشمول جہلم، چکوال، سرگودھا، لاہور، سیالکوٹ، گوجرانوالہ، گوجرات، فیصل آباد اور نارروال میں شدید بارش کا امکان ہے۔

اس دوران ڈی جی خان، راجن پور اور رحیم یار خان میں پہاڑی ندی نالوں میں پانی کے بہاؤ میں اضافہ متوقع ہے۔ پیر پنجال رینج سے نکلنے والے نالوں میں برساتی پانی کے بہائو اضافے کے باعث شمال مشرقی پنجاب کے علاقوں میں سیلابی صورتحال کا خدشہ ظاہر کیا گیا ہے۔

(جاری ہے)

اسی طرح خیبر پختونخوا میں دیر، سوات، مانسہرہ، کوہستان، نوشہرہ، پشاور، مردان، بونیر، وزیرستان و دیگر علاقوں میں تیز بارشوں کے باعث اچانک سیلابی صورتحال بن سکتی ہے۔

دریائے کابل، دریائے سوات، پنجکورہ اور کلپانی نالے میں پانی کی سطح بلند ہونے کا خدشہ ہے۔ نوشہرہ کے مقام پر دریائے کابل میں سیلابی صورتحال کا امکان ظاہر کیا گیا ہے۔ علاوہ ازیں بلوچستان کے علاقوں زیارت، کوئٹہ، مستونگ، قلات، خضدار، لورالائی، موسیٰ خیل، ڈیرہ بگٹی و دیگر میں مقامی ندی نالوں میں طغیانی کا امکان ہے۔ بارشوں کے باعث پہاڑی علاقوں میں لینڈ سلائیڈنگ اور نشیبی علاقوں میں سیلابی صورتحال پیدا ہو سکتی ہے۔

اس حوالے سے ایڈوائزری میں کہا گیا ہے کہ عوام ندی نالوں میں بہاؤ کے اضافے کے پیش نظر محتاط رہیں اور غیر ضروری سفر سے اجتناب کریں۔ مقامی انتظامیہ اور متعلقہ ادارے ممکنہ لینڈ سلائیڈنگ اور سیلابی صورتحال سے متاثرہ سڑکوں کی فوری بحالی کے لئے مشینری تیار رکھیں۔ این ڈی ایم اے نے تمام متعلقہ اداروں کو ہدایات جاری کی ہیں کہ کسی بھی ممکنہ ہنگامی صورتحال سے نمٹنے کے لیے پیشگی اقدامات کو یقینی بنایا جائے۔ عوام کو مشورہ دیا گیا ہے کہ موسم اور ممکنہ خطرات کے حوالے سے آگاہی کے لیے پاک این ڈی ایم اے ڈیزاسٹر الرٹ ایپ سے راہنمائی لیں۔