Live Updates

یہ حکمران جب تک رہیں گے ان کا ہر لمحہ ملک پر بھاری ہے، شاہد خاقان عباسی

حکمرانوں میں مایوسی اور بے بسی نظر آتی ہے، ان کی نہ سیاست میں عزت ہے اور نہ ہی عوام کی خدمت ہے، ملک کے مسائل برقرار ہیں، جب عدل کا نظام ختم ہو جاتا ہے تو ملک ترقی نہیں کرتا؛ تقریب سے خطاب

ساجد علی ہفتہ 12 جولائی 2025 11:12

یہ حکمران جب تک رہیں گے ان کا ہر لمحہ ملک پر بھاری ہے، شاہد خاقان عباسی

اسلام آباد ( اُردو پوائنٹ اخبارتازہ ترین۔ 12 جولائی 2025ء ) ملک کے سابق وزیراعظم اور عوام پاکستان پارٹی کے سربراہ شاہد خاقان عباسی کا کہنا ہے کہ یہ حکمران جب تک رہیں گے ان کا ہر لمحہ ملک پر بھاری ہے کیوں کہ ان کی نہ سیاست میں عزت ہے اور نہ ہی عوام کی خدمت ہے اور ملک کے مسائل برقرار ہیں۔ اپنی جماعت عوام پاکستان پارٹی کے یوم تاسیس سے خطاب کرتے ہوئے انہوں نے کہا کہ حکومت کا ایک کام بتادیں جس میں عوام کی فلاح اور نوجوانوں کے مسائل کا حل ہوں، اربوں روپے خرچ کرتے ہیں لیکن کیا تعلیم اور صحت کا نظام بہتر ہے؟ شاہد خاقان عباسی نے کہا کہ سیاست کا مقصد ایک دوسرے کو گالیاں دینا رہ گیا، آج حکمرانوں میں مایوسی اور بےبسی نظر آتی ہے، یہ حکمران جب تک رہیں گے ان کا ہر لمحہ ملک پر بھاری ہے کیوں کہ جب عدل کا نظام ختم ہو جاتا ہے تو ملک ترقی نہیں کرتا، ملک کے آدھے لوگ خط غربت سے نیچے چلے گئے ہیں، ہماری جماعت ایسی ہوگی جو ملک اور اسکے مسائل کی بات کرے گی۔

(جاری ہے)

عوام پاکستان پارٹی کے سربراہ یہ بھی کہہ چکے ہیں کہ اس وقت ملک میں ہائبرڈ نظام ہے، بادشاہی نظام ہے، بادشاہ کی بات نہیں سنیں گے تو آپ کو تکلیف تو ہوگی، جمہوریت صرف ایک عمل کا نام نہیں ایک سوچ ہے، جمہوریت میں ایک بڑا پہلوں آئین کا ہوتا ہے، جمہوریت کی بنیاد الیکشن سے شروع ہوتی ہے اور جب الیکشن ہی متنازعہ ہو جائیں، عوام اپنی رائے کا اظہار کریں اور اس کا احترام نہ کیا جائے تو جمہوریت تو نہ رہی اور جس دن عوام سڑکوں پر آئے گی اس دن کسی کا کچھ نہیں بچے گا عوام نے یہ نہیں دیکھنا کون کس جماعت سے ہے اور کس کے پاس طاقت ہے۔

شاہد خاقان عباسی کا کہنا تھا کہ وزیر اعظم، وزیر اعلیٰ سمجھتے ہیں جو وہ کہتے ہیں، وہ قانون ہے، وزیر اعظم مجھ سے کبھی رابطہ نہیں کریں گے، یہ انکو بھی پتا ہے اور مجھے بھی معلوم ہے، سب سے پہلے اس کو ڈی سیٹ کرنا چاہئے جو ایک منتخب نمائندے کو ڈی سیٹ کرنے کی بات کررہا ہے، عوام عمران خان کے ساتھ کھڑی ہے، ہر وہ سیاستدان جس کے پیچھے عوام کھڑی ہوتی ہے وہ ڈٹ کر جیل کاٹ لیتا ہے، عمران خان کو پے رول پر رہا کریں، ان کو بٹھائیں اور بات چیت کریں، ایک دوسرے کی بات سنیں یہی سیاست ہوتی ہے، سیاست دشمنی نہیں ہوتی لیکن جب سپریم کورٹ کے جج کو کوئی اور فیصلے لکھ کر دے رہا ہو تو پھر ملک کا نظام تو ختم ہو چکا ہے۔