جو روٹ ٹیسٹ کرکٹ کی تاریخ کے کامیاب ترین فیلڈر بن گئے

روٹ نے 266 اننگز میں 211 کیچز لے کر سابق بھارتی لیجنڈ راہول ڈریوڈ کا ریکارڈ توڑ دیا

ذیشان مہتاب ہفتہ 12 جولائی 2025 11:30

جو روٹ ٹیسٹ کرکٹ کی تاریخ کے کامیاب ترین فیلڈر بن گئے

لندن (اردو پوائنٹ تازہ ترین اخبار ۔ 12 جولائی 2025ء ) انگلش کرکٹ ٹیم کے اسٹار پلیئر جو روٹ نے ٹیسٹ کرکٹ میں ایک اور سنگِ میل عبور کرتے ہوئے نئی تاریخ رقم کردی۔

جمعہ کو لارڈز ٹیسٹ میں بھارت کے خلاف جاری تیسرے ٹیسٹ کے دوران انگلش کرکٹ ٹیم کے جو روٹ نے بھارتی بلے باز کرن نائر کا کیچ تھام کر ٹیسٹ کرکٹ میں سب سے زیادہ کیچز لینے والے فیلڈر (نان وکٹ کیپر) بننے کا اعزاز حاصل کیا۔

(جاری ہے)

روٹ نے اب تک 266 اننگز میں 211 کیچز لے کر سابق بھارتی لیجنڈ راہول ڈریوڈ کا ریکارڈ توڑ دیا، جنہوں نے 301 اننگز میں 210 کیچز لیے تھے۔

اس سے قبل بیٹنگ میں بھی روٹ کا جادو جاری رہا، انہوں نے لارڈز ٹیسٹ کی پہلی اننگز میں 104 رنز کی شاندار اننگز کھیلی، جو ان کے ٹیسٹ کیریئر کی 37ویں سنچری تھی۔

ان کی بیٹنگ کی بدولت انگلینڈ نے پہلی اننگز میں 387 رنز بنائے۔ جواب میں بھارت نے دوسرے دن کھیل کے اختتام پر 3 وکٹوں پر 145 رنز بنا لیے ہیں۔

یاد رہے کہ یہ پانچ میچوں کی سیریز کا تیسرا ٹیسٹ ہے اور سیریز اس وقت 1-1 سے برابر ہے۔