عالمی مارکیٹ میں آرگینک خوراک ومصنوعات کے حجم میں 56 ارب ڈالر اضافہ ہوا،نجم مزاری

ہفتہ 12 جولائی 2025 16:02

اسلام آباد (اُردو پوائنٹ اخبارتازہ ترین - اے پی پی۔ 12 جولائی2025ء) آرگینک خوراک اور مصنوعات پر ریسرچ کرنے والے ادارے کے سربراہ نجم مزاری نے کہا ہے کہ2024اور 2025میں عالمی سطح پر آرگینک خوراک اور مصنوعات نے نیا عروج حاصل کیا ہے ،2024 میں عالمی مارکیٹ کاحجم 230 ارب ڈالر تھا جو صرف ایک سال میں286 ارب ڈالر تک پہنچ گیا۔ ہفتہ کو اپنے ایک بیان میں انہوں نے کہا کہ یوکرین نے 2022 میں 245,600 میٹرک ٹن آرگینک مکئی، گند م اور سویا بین 36ممالک کو برآمد کی ہے ۔

نجم مزاری نے کہا کہ یورپ کے بہت سے ممالک آرگینک خوراک اور مصنوعات کے بڑے خریدار ہیں جو پہلے ہی پاکستان سے مختلف مصنوعات درآمد کر رہے ہیں ۔ انہوں نے کہا کہ پاکستان کے چین ،امریکا اور جرمنی سمیت دیگر ممالک سے بہترین تعلقات ہیں اور پاکستان کو آرگینک خوراک اور مصنوعات کی پیداوار بڑھانے اور اس کی برآمدات میں اضافے کے لئے ان ممالک سے نہ صر ف رہنمائی لینی چاہیے بلکہ تربیت کے لئے جوائنٹ ونچر بھی کیا جا سکتا ہے جس کا پاکستان کو معاشی طور پر بہت فائدہ ہوگا۔

(جاری ہے)

انہوں نے کہا کہ ہماری نوجوان نسل زراعت سے دور ہو رہی ہے آرگینک خوراک کو جدت کے ساتھ فروغ دے کرانہیں بھی اس جانب راغب کیا جا سکتا ہے ۔انہوں نے کہا کہ ایک رپورٹ کے مطابق 34-2023 کےدرمیان آرگینک خوراک اور مصنوعات کی مارکیٹ کا حجم600 ارب ڈالر سے ایک ٹریلین ڈالر تک پہنچنے کا تخمینہ ہے اور پاکستان پیشرفت کر کے اس مارکیٹ میں اپنا بڑا شیئر حاصل کر سکتا ہے ۔