1931میں جو قربانی پیش کی گئی وہ آج بھی کشمیریوں کیلئے مشعل راہ ہے،بیرسٹرسلطان محمود

ہفتہ 12 جولائی 2025 17:11

اسلام آباد(اُردو پوائنٹ اخبارتازہ ترین - این این آئی۔ 12 جولائی2025ء)صدر آزاد جموں وکشمیر بیرسٹر سلطان محمود چوہدری نے کہا ہے کہ 13جولائی کا دن ریاست جموں و کشمیر کے مسلمانوں کی تحریک میں تاریخ ساز اہمیت کا حامل ہے،1931میں آج کے دن جو قربانی پیش کی گئی وہ آج بھی کشمیریوں کیلئے مشعل راہ ہے، سرینگر سنٹرل جیل کے احاطہ میں کلمہ گو اور آزادی کے متوالوں نے اپنے لہو کا نذرانہ پیش کر کے جس جد و جہد آزادی کی بنیاد رکھی تھی وہ آج تک جاری و ساری ہے،مقبوضہ کشمیر میں جاری تحریک کو کشمیریوں نے اپنے خون سے زندہ رکھا ہوا ہے۔

13جولائی یوم شہدائے کشمیر کے موقع پر اپنے خصوصی پیغام میں بیرسٹر سلطان محمود چوہدری نے بیس کیمپ کی حکومت لائن آف کنٹرل کے اس پار بسنے والے اپنے کشمیری بھائیوں کو ایک مرتبہ پھر یقین دلاتی ہے کہ مشکل کی ہر گھڑی میں اپنے کشمیری بھائیوں کے ساتھ ہیں اور انہیں اپنے جسم کا حصہ سمجھتے ہیں۔

(جاری ہے)

انہوںنے کہاکہ تحریک آزاد ی کشمیر، کشمیری عوام کی قربانیوں کی بدولت ایک نئے موڑ میں داخل ہو چکی ہے۔صدرنے کہاکہ کشمیری عوام کے مضبوط عزم اور جذبہ حریت کے سامنے بھارت جھکنے پر مجبور ہو چکا ہے اور قابض فوج کے حوصلے پست ہو چکے ہیں مسئلہ کشمیر نے عالمی رائے عامہ کو اپنی طرف متوجہ کر لیا ہے اور دنیا مسئلہ کشمیرکے حل میں گہری دلچسپی لے رہی ہے۔