جولائی شہداء نے جموں کشمیر میں ڈوگرہ حکمرانوں کے ظلم و جبر کیخلاف آزادی کی شمع روشن کی،پیرمحمد مظہر سعید شاہ

آزادی کی تمنا میں جاری جدوجہد میں دی جانیوالی قربانیاں کشمیریوں کومنزل کے قریب تر کر رہی ہیں،وزیر اطلاعات

ہفتہ 12 جولائی 2025 21:50

مظفرآباد (اُردو پوائنٹ اخبارتازہ ترین - این این آئی۔ 12 جولائی2025ء)وزیر اطلاعات آزاد حکومت ریاست جموں وکشمیر پیرمحمد مظہر سعید شاہ نے 13 جولائی 1931 کے شہدا ء کو خراج عقیدت پیش کرتے ہوئے کہا ہے کہ شہداء کی قربانیاں ہمارے لیے مشعل راہ ہیں۔ مقبوضہ جموں کشمیر میں آئے روز آزادی کی تمنا میں جاری جدوجہد میں دی جانیوالی قربانیاں کشمیریوں کومنزل کے قریب تر کر رہی ہیں۔

13 جولائی کیشہداء کے مقدس خون نے جموں و کشمیر میں ڈوگرہ حکمرانوں کے ظلم و جبر کے خلاف آزادی کی شمع روشن کی۔ 13 جولائی 1931 تحریک آزادی کشمیر کا نقطہ آغاز ہے۔ تحریک آزادی کشمیر کی کامیابی یعنی تکمیل پاکستان تک کشمیری اپنی جدوجہد جاری رکھیں گے۔ وزیر اطلاعات نے کہا کہ ہم عہد کرتے ہیں کہ 13 جولائی 1931 کے شہداء نے جس عظیم مقصد کے لیے اپنی جانوں کی عظیم قربانی دی تھی اُس مقصد کو پورا کرنے تک شہدا کا مشن نا مکمل رہے گا۔

(جاری ہے)

یوم شہدائے کشمیر کے موقع پر اپنے خصوصی پیغام میں وزیر اطلاعات پیر محمد مظہر سعید شاہ نے کہا کہ مقبوضہ جموں و کشمیر کی علیحدہ پہچان اور شناخت کو ختم کرنے، اس کی آبادی کے تناسب کو تبدیل کرنے اور کشمیریوں کو اُن کی زمین، حق ملکیت، تعلیم، صحت اور روزگار سے محروم کرنے کی نا پاک کوششوں کی کسی صورت تکمیل نہیں ہونے دیں گے اور کشمیریوں کی آواز کو دنیا کے ہر ایوان تک پہنچا کر اُن کے لیے انصاف حاصل کرنے میں کوئی دقیقہ فرو گزاشت نہیں کریں گے۔ وزیر اطلاعات نے کہا کہ کشمیر کی مقدس دھرتی شہداء کے مقدس لہو سے معطر ہے، انشاء اللہ شہداء کی قربانیاں رنگ لائیں گی اور مقبوضہ کشمیر بھارتی تسلط سے آزاد ہوگا۔