موٹر سائیکل لائسنس ِ کیلئے خصوصی مہم جاری،35 لاکھ سے زائد شہری مستفید، ترجمان سی ٹی او

اتوار 13 جولائی 2025 13:30

لاہور (اُردو پوائنٹ اخبارتازہ ترین - اے پی پی۔ 13 جولائی2025ء) صوبہ بھر میں موٹر سائیکل لائسنس کے حصولِ کیلئے خصوصی مہم جاری ہے۔ترجمان ٹریفک پولیس پنجاب کے مطابق رواں سال موٹر سائیکل لائسنس کے اجرا میں ریلیف سے 35 لاکھ سے زائد شہری مستفید ہوئے جبکہ رواں سال 14 لاکھ 81 ہزار سے زائد شہریوں نے موٹر سائیکل کے ریگولر ڈرائیونگ لائسنس حاصل کرنے کے ساتھ ساتھ 2 لاکھ 74 ہزار سے زائد ریگولر لائسنس کی تجدید بھی کروائی اور 11 لاکھ سے زائد شہریوں نے موٹر سائیکل کے لرننگ ڈرائیونگ لائسنس بنوائے۔

(جاری ہے)

ترجمان نے بتایا کہ صوبہ بھر میں 6 لاکھ 51 ہزار سے زائد شہریوں نے لرننگ لائسنس کی تجدید کروائی۔23 ہزار سے زائد ملکی و غیر ملکی پاکستانیوں نے موٹر سائیکل کے انٹرنیشنل ڈرائیونگ پرمٹ بنوائے۔ ڈی آئی جی ٹریفک محمد وقاص نذیر نے کہا کہ بغیر لائسنس کے موٹرسائیکل سواروں کو شاہراہوں پر نہیں آنے دیں گے ۔ موٹر سائیکل کے لرننگ لائسنس پر42 دن کی مدت کو ختم کردیا گیا ہے۔پاکستان کا ہرشہری اصل شناختی کارڈ کے ہمراہ صوبہ پنجاب سے ڈرائیونگ لائسنس حاصل کر سکتا ہے۔ ڈرائیونگ لائسنس کے حصول کیلئے شہری خدمت مراکزسے فائدہ حاصل کر سکتے ہیں ۔