�ولائی کا دن مقبوضہ جموں وکشمیر کے مسلمانوں کی تحریک میں تاریخ ساز اہمیت کا حامل ہے،عامرعبدالغفار لون

اتوار 13 جولائی 2025 14:35

مظفرآباد(اُردو پوائنٹ اخبارتازہ ترین - این این آئی۔ 13 جولائی2025ء)آزاد حکومت ریاست جموں وکشمیر کے وزیر ماحولیات عامر عبدالغفار لون نے کہا ہے کہ 13جولائی کا دن مقبوضہ جموں وکشمیر کے مسلمانوں کی تحریک میں تاریخ ساز اہمیت کا حامل ہے،13 جولائی1931میں آج کے دن جو قربانی پیش کی گئی وہ آج بھی کشمیریوں کیلئے مشعل راہ ہے، سرینگر سنٹرل جیل کے احاطہ میں کلمہ گو اور آزادی کے متوالوں نے اپنے لہو کا نذرانہ پیش کر کے جس جدوجہد آزادی کی بنیاد رکھی تھی وہ آج تک جاری و ساری ہے،مقبوضہ جموں وکشمیر میں جاری تحریک کو کشمیریوں نے اپنے خون سے زندہ رکھا ہوا ہے۔

13جولائی یوم شہدائے کشمیر کے موقع پر اپنے خصوصی پیغام میں عامر عبدالغفار لون نے کہا کہ بیس کیمپ کی حکومت لائن آف کنٹرل کے اس پار بسنے والے اپنے کشمیری بھائیوں کو ایک مرتبہ پھر یقین دلاتی ہے کہ مشکل کی ہر گھڑی میں اپنے کشمیری بھائیوں کے ساتھ ہیں اور انہیں اپنے جسم کا حصہ سمجھتے ہیں۔

(جاری ہے)

تحریک آزادی کشمیر کشمیری عوام کی قربانیوں کی بدولت ایک نئے موڑ میں داخل ہو چکی ہے۔

کشمیری عوام کے مضبوط عزم اور جذبہ حریت کے سامنے بھارت جھکنے پر مجبور ہو چکا ہے اور قابض فوج کے حوصلے پست ہو چکے ہیں مسئلہ کشمیر نے عالمی رائے عامہ کو اپنی طرف متوجہ کر لیا ہے اور دنیا مسئلہ کشمیر کے حل میں گہری دلچسپی لے رہی ہے ان شاء اللہ مسئلہ کشمیر بہت جلد حل ہو گا مقبوضہ جموں وکشمیر کے کشمیریوں کو ان کا پیدائشی حق حق خودارادیت مل کر رہے گا۔