وزیر خارجہ سینیٹر محمد اسحاق ڈار تیانجن میں ایس سی او کے سی ایف ایم اجلاس میں پاکستانی وفد کی قیادت کریں گے

اتوار 13 جولائی 2025 20:30

اسلام آباد (اُردو پوائنٹ اخبارتازہ ترین - اے پی پی۔ 13 جولائی2025ء) نائب وزیر اعظم اور وزیر خارجہ سینیٹر محمد اسحاق ڈارچین کے وزیر خارجہ وانگ یی کے دعوت پر 14 سے 16 جولائی 2025 کو چین کے شہر تیانجن میں منعقد ہونے والی شنگھائی تعاون تنظیم ( ایس سی او)کے کونسل آف فارن منسٹرز(سی ایف ایم) کے اجلاس میں پاکستانی وفد کی قیادت کریں گے۔ترجمان دفتر خارجہ کی طرف سے اتوار کو جاری بیان کے مطابق ایس سی اوکے تمام رکن ممالک جن میں پاکستان، چین، بیلاروس، بھارت، ایران، قازقستان، کرغزستان، روس، تاجکستان اور ازبکستان شامل ہیں، کے وزرائے خارجہ کونسل آف فارن منسٹرزکے اجلاس میں شرکت کریں گے۔

بیلاروس کے وزیر خارجہ پہلی بار ایس سی او کے رکن کی حیثیت سے اس اجلاس میں شریک ہوں گے۔

(جاری ہے)

کونسل آف فارن منسٹرز ایس سی او کا تیسرا اعلی ترین فورم ہے جو بین الاقوامی تعلقات کے مسائل کے ساتھ ساتھ ایس سی اوکی خارجہ اور سلامتی پالیسیوں پر توجہ مرکوز کرتا ہے۔ یہ فورم اعلامیوں، بیانیوں سمیت دستاویزات کی منظوری دیتا ہے، جو کہ کونسل آف ہیڈز آف اسٹیٹ (سی ایچ ایس) کے غور کے لیے پیش کی جاتی ہیں۔ سی ایچ ایس کا آئندہ اجلاس 31 اگست سے یکم ستمبر 2025 تک تیانجن، چین میں ہوگا۔ پاکستان کے نائب وزیر اعظم اور وزیر خارجہ سی ایف ایم اجلاس کے موقع پر اپنے ہم منصبوں کے ساتھ دوطرفہ ملاقاتیں بھی کریں گے۔