وفاقی وزیرداخلہ محسن نقوی سرکاری دورے پر ایران پہنچ گئے

اتوار 13 جولائی 2025 21:20

وفاقی وزیرداخلہ محسن نقوی سرکاری دورے پر ایران پہنچ گئے
تہران (اُردو پوائنٹ اخبارتازہ ترین - اے پی پی۔ 13 جولائی2025ء) وفاقی وزیرداخلہ محسن نقوی سرکاری دورے پر ایران پہنچ گئے، امام خمینی انٹرنیشنل ائرپورٹ پر ایران کے وزیر داخلہ اسکندر مومنی نے پاکستانی ہم منصب محسن نقوی کا پرتپاک استقبال کیا۔ وزارت داخلہ کی طرف سے اتوار کو جاری بیان کے مطابق ایران کی وزارت داخلہ کے اعلی حکام، ایران میں پاکستان کے سفیر محمد مدثر ٹیپو، قونصلر آفتاب بٹ اور سفارتی افسران بھی اس موقع پر موجود تھے۔

وفاقی وزیرداخلہ محسن نقوی نے ایرانی ہم منصب سے ملاقات کی اور باہمی دلچسپی کے امور اور پاک ایران تعلقات پر تبادلہ خیال کیا۔ ایرانی وزیر داخلہ نے کہا کہ اپنے بھائی کو ایران آمد پر دل کی اتھاہ گہرائیوں سے خوش آمدید کہتے ہیں، یقینا آپ کا دورہ پاک ۔

(جاری ہے)

ایران تعلقات کے فروغ میں معاون ثابت ہو گا۔ اس موقع پر وفاقی وزیر داخلہ محسن نقوی نے کہا کہ ایران ہمارا برادر ہمسایہ ملک ہے، ہم ایران کے ساتھ دوطرفہ تعلقات کو خصوصی اہمیت دیتے ہیں۔

محسن نقوی نے کہا کہ امید ہے کہ پاک ۔ ایران اور عراق سہ ملکی کانفرنس سے زائرین کے مسائل حل کرنے میں مدد ملے گی۔ وزیر داخلہ محسن نقوی نے ایران کے سپریم لیڈر آیت اللہ خامنہ ای اور صدر مسعود پزشکیان کے لیے نیک خواہشات کا اظہار کیا۔ وفاقی وزیرداخلہ محسن نقوی کل (پیر) کو تہران میں انتہائی مصروف دن گزاریں گے۔ وزیرداخلہ محسن نقوی زائرین اور بارڈر ایشوز پر کل تہران میں منعقدہ سہ ملکی کانفرنس میں شرکت کریں گے، سہ ملکی کانفرنس میں ایران اور عراق کے وزرائے داخلہ بھی شریک ہوں گے۔

واضح رہے کہ زائرین ۔ بارڈر اور دیگر متعلقہ مسائل کے حل کیلئے پاکستان کی درخواست پر سہ ملکی کانفرنس کا انعقاد ہو رہا ہے۔ وفاقی وزیرداخلہ محسن نقوی ایران کے صدر مسعود پزشکیان سے بھی ملاقات کریں گے۔