Live Updates

’کاش وہ ویڈیوز ریلیز ہو جائیں جن میں آپ ’اُن‘ کے پیروں پر ہاتھ رکھ کر روتے ہوئے معافیاں مانگ رہے تھے‘

علی امین گنڈاپور سے متعلق رہنماء جے یو آئی ف کا دعویٰ

ساجد علی پیر 14 جولائی 2025 12:27

’کاش وہ ویڈیوز ریلیز ہو جائیں جن میں آپ ’اُن‘ کے پیروں پر ہاتھ رکھ ..

اسلام آباد ( اُردو پوائنٹ اخبارتازہ ترین۔ 14 جولائی 2025ء ) جمعیت علماء اسلام ف کے سربراہ مولانا فضل الرحمان کے بھائی ضیاء الرحمان نے وزیراعلیٰ خیبرپختونخواہ علی امین گنڈاپور سے متعلق نیا دعویٰ کردیا۔ تفصیلات کے مطابق اپنے ایک ویڈیو بیان میں انہوں نے وزیراعلیٰ خیبرپختونخواہ کو مخاطب کرتے ہوئے کہا کہ میری حسرت ہے کہ اے کاش وہ ویڈیوز ریلیز ہو جائیں جن میں آپ ’اُن‘ کے پیروں پر ہاتھ رکھ کر روتے ہوئے گڑ گڑا کر معافیاں مانگ رہے تھے، وہاں آپ صرف معافیاں ہی نہیں مانگ رہے تھے بلکہ اپنے لیڈر عمران خان، ان کی اہلیہ بشریٰ بی بی اور ہمشیرہ علیمہ خان کو گالیاں دے رہے تھے۔

رہنماء جے یو آئی ف نے الزام عائد کیا کہ آپ اپنی پارٹی کی لیڈر شپ کے خلاف جو زبان استعمال کر رہے تھے اور ’ان‘ کے پیروں پر ہاتھ رکھ کر کہہ رہے تھے کہ میں پی ٹی آئی کو تقسیم کروں گا، ان کے اندر دراڑیں ڈالوں گا، میں ان کی تمام حکمت عملیوں اور تحریک کو ناکام کروں گا، اسی لیے عمران خان کی رہائی کی تحریک کو آپ نے ناکام کیا، ورکرز کو اسلام آباد میں چھوڑ کر پشاور چلے گئے، جو شخص پارٹی کے لیڈر کا سودا کرتا ہے، لیڈرشپ کو گالیاں دیتا ہے اور تقسیم کی بات کرتا ہے وہ منافق ہوتا ہے۔

(جاری ہے)

مولانا فضل الرحمان کے بھائی نے وزیر اعلی علی امین گنڈاپور کا الیکشن لڑنے کا چیلنج قبول کرلیا

مولانا فضل الرحمان نے تو تمہارے لیڈر کو اقتدار کی کرسی سے گھسیٹ کر نکالا تھا، تم اپنے بھائی سے استعفا دلوا کر ان کا مجھ سے مقابلہ کراؤ: انجینیئر ضیا الرحمان pic.twitter.com/xbFeuBHoKa
— Farzana Ali (@farzanaalispark) July 14, 2025

ضیاء الرحمان نے مزید کہا کہ مولانا فضل الرحمان نے تحریک انصاف کو انتہائی مخلصانہ مشورہ دیا کہ صوبے کے حالات کے پیش نظر پی ٹی آئی کو اپنے اندر سے سوبائی حکومت میں تبدیلی لانی چاہیئے لیکن اس پر کٹھ پتلی وزیراعلیٰ نے جو ردعمل دیا علی امین گنڈاپور کی ان باتوں سے تو لگتا ہے ان کے جانے کا وقت ہوچکا ہے، ہمیں تمہارا چیلنج قبول ہے، تمہاری اوقات نہیں کہ مولانا فضل الرحمان تمہارا چیلنج قبول کرے، مولانا فضل الرحمان نے تو تمہارے لیڈر کو اقتدار کی کرسی سے گھسیٹ کر نکالا تھا، تم آج اور اسی وقت اپنے بھائی سے استعفیٰ دلوا کر پہلے مفتی محمود کے اس بیٹے سے مقابلہ کرکے دکھاؤ پھر دوسرے بیٹے کا نام اپنی زبان پر لانا، ہم جلد خیبرپختونخواہ کے عوام کو کرپٹ حکومت سے چھٹکارا دلائیں گے۔