فرنٹیئر کانسٹیبلری کو ملک گیر فیڈرل فورس میں تبدیل کرنے کا آرڈیننس جاری

ایف سی کو چاروں صوبوں، اسلام آباد، آزاد جموں و کشمیر، گلگت بلتستان میں بھی کام کرنے کا اختیار حاصل ہو گا

ساجد علی پیر 14 جولائی 2025 14:40

اسلام آباد ( اُردو پوائنٹ اخبارتازہ ترین۔ 14 جولائی 2025ء ) فرنٹیئر کانسٹیبلری کو ملک گیر فیڈرل فورس میں تبدیل کرنے کا آرڈیننس جاری کردیا گیا، آرڈیننس کے اجراء کے فوری بعد وزارتِ قانون و انصاف نے اس حوالے سے ایک باضابطہ نوٹی فکیشن جاری کر دیا۔ تفصیلات کے مطابق وفاقی حکومت کی جانب سے فرنٹیئر کانسٹیبلری (ایف سی) کو ملک گیر وفاقی فورس میں توسیع دینے کا فیصلہ کیا گیا اس فیصلے پر عمل درآمد کے لیے وفاقی کابینہ کی طرف سے فرنٹیئر کانسٹیبلری ایکٹ 1915ء میں ترامیم کی منظوری کے بعد پورے پاکستان میں ایف سی کے دائرہ اختیار کو بڑھانے کے لیے ایک آرڈیننس جاری کیا گیا ہے، حکومت نے فرنٹیئر کانسٹیبلری کو ملک گیر فیڈرل فورس میں تبدیل کرنے کا آرڈیننس جاری کیا۔

بتایا گیا ہے کہ آرڈیننس س کے تحت اب یہ فیڈرل کانسٹیبلری کہلائے گی، اس حوالے سے صدرِ مملکت آصف علی زرداری نے آرڈیننس جاری کیا، جس کے تحت ایف سی کو چاروں صوبوں، اسلام آباد، آزاد جموں و کشمیر، گلگت بلتستان میں بھی کام کرنے کا اختیار حاصل ہو گا، فیڈرل کانسٹیبلری کا انسپیکٹر جنرل وفاقی حکومت تعینات کرے گی تاکہ ملک میں امن و امان برقرار رکھا جا سکے، قانون نافذ کرنے والے اداروں کی معاونت کی جا سکے اور سکیورٹی کے مختلف تقاضوں کو مربوط انداز میں پورا کیا جائے۔

(جاری ہے)

معلوم ہوا ہے کہ آرڈیننس کے نفاذ کے بعد اس نئی فورس کے لیے ملک بھر میں بھرتیاں بھی کی جائیں گی، نئی فورس کے ملک بھر میں دفاتر قائم کیے جائیں گے، تنظیم نو فریم ورک کے تحت، فیڈرل کانسٹیبلری کی کمانڈ پولیس سروس آف پاکستان کے افسران کریں گے، فیڈرل کانسٹیبلری کے قیام سے ملکی داخلی سلامتی اور امن او عامہ کے قیام میں خاطر خواہ مدد ملے گی، اس اقدام کو قومی سطح پر داخلی سلامتی کے طریقہ کار کو مضبوط اور مرکزی بنانے کی وسیع تر کوششوں کا حصہ قرار دیا جا رہا ہے۔