عوامی تاجر اتحاد پاکستان کا 37AAایکٹ پر شدید تحفظات کا اظہار

اسلام آباد(اُردو پوائنٹ اخبارتازہ ترین - این این آئی۔ 14 جولائی2025ء)عوامی تاجر اتحاد پاکستان نے 19جولائی کو 37AAایکٹ کیخلاف لاہور چیمبر آف کامرس کے پر امن احتجاج اور ہڑتال کی مکمل حمایت کا اعلان کردیا۔تفصیلات کے مطابق عوامی تاجر اتحاد پاکستان کا ہنگامی اجلاس سینئررہنماحاجی محمداسحاق کی زیرصدارت منعقد ہوا۔اجلاس میں 37AAیکٹ پر شدید تحفظات کا اظہار کیا گیا۔

اجلاس میں شریک عوامی تاجر اتحاد کے سینئر رہنماؤں نے متفقہ طور پر مطالبہ کیا کہ اس متنازعہ اور غیر منصفانہ،کاروبار دشمن ایکٹ کو فی الفور واپس لیا جائے جو کاروباری طبقے کے خلاف استعمال ہونے کے خدشات سے بھرا ہوا ہے۔اجلاس میں کہاگیاکہ عوامی تاجر اتحاد پاکستان19جولائی کو اس ایکٹ کے خلاف لاہور چیمبر آف کامرس کے پر امن احتجاج اور ہڑتال کی مکمل حمایت کا اعلان کرتی ہے۔

(جاری ہے)

اجلاس سے خطاب کرتے ہوئے عوامی تاجر اتحاد کے رہنما راشد چودھری ایڈووکیٹ نے کہاکہ یہ ایکٹ تاجر برادری کو ہراساں کرنے کا نیا ذریعہ ہے۔انہوں نے کہاکہ37AAایکٹ ایف بی آر کو بلاوارنٹ چھاپے،ریکارڈ ضبطگی اور گرفتاری کے وسیع اختیارات دیتا ہے جو نہ صرف تاجر برادری کے اعتماد کو ٹھیس پہنچاتا ہے بلکہ کاروباری ماحول کو سخت متاثر کرتا ہے۔انہوں نے کہاکہ اس قانون کے ذریعے تاجروں کو پہلے سے مجرم تصور کیا جا رہا ہے حالانکہ تاجرقانون کے پابند اور ایمانداری سے کاروبار کرنے والے شہری ہیں۔

انہوں نے اس قانون کوکاروبار دشمن اور معاشی قاتل قرار دیتے ہوئے واپس لینے کا مطالبہ کیا۔راشد چوہدری ایڈووکیٹ نیٹیکسوں اور توانائی کے ذریعے کی قیمتوں میں ہوشربا اضافے پر سخت تشویش کا اظہار کرتے ہوئے کہاکہ ناقص معاشی حکمت عملیوں نے کاروباری طبقے کو بدترین بحران میں دھکیل دیا ہے جس کے نتیجے میں معیشت مفلوج ہو چکی ہے۔کاروباری طبقے کو دیوار سے لگا دیا گیا۔

چھوٹے تاجر برباد ہو رہے ہیں جبکہ بڑے کاروباری حضرات بھی عدم تحفظ کا شکا ر ہیں۔انہوں نے کہاکہ مہنگائی کے اس طوفان نے عام شہری کے ساتھ ساتھ تاجر برادری کو بھی بے حال کر دیا ہے۔تاجر برادری ملک کی معیشت کی ریڑھ کی ہڈی ہیں لیکن آج انہیں سڑکوں پر احتجاج کرنے پر مجبور کیا جا رہا ہے۔اجلاس میں ثاقب بھٹی،شہزاد خان و دیگر تاجر رہنماں نے شرکت کی۔