Live Updates

وزیراعلی سندھ کی حیدرآباد میں بارش کے پانی کی نکاسی کیلئے ہنگامی اقدامات کی ہدایت

پیر 14 جولائی 2025 22:50

کراچی (اُردو پوائنٹ اخبارتازہ ترین - اے پی پی۔ 14 جولائی2025ء) وزیراعلی سندھ سید مراد علی شاہ نے حیدرآباد میں شدید بارش کے باعث مختلف علاقوں میں سیلاب جیسی صورتحال پیدا ہونے کا جائزہ لیا اوربارش کے پانی کی فوری نکاسی کے لیے ہنگامی اقدامات کی ہدایت کی۔پیر کو وزیر اعلی ہائوس سے جاری اعلامیہ کے مطابق انہوں نے میئر حیدرآباد سے رابطہ کرکے نکاسی آب کی کوششوں پر تفصیلی بریفنگ لی۔

بارش کے بعد حیسکو کے فیڈر ٹرپ ہونے سے بجلی کی فراہمی معطل ہو گئی تھی جس کے باعث نکاسی آب کے پمپنگ اسٹیشن عارضی طور پر بند ہو گئے اور نکاسی کا عمل متاثر ہوا، جس پر وزیراعلی سندھ نے وزیر توانائی ناصر شاہ کو ہدایت دی کہ وہ فوری طور پر حیسکو حکام سے رابطہ کرکے پمپنگ اسٹیشنز کی بجلی بحال کروائیں۔

(جاری ہے)

سید مراد علی شاہ نے ضلعی انتظامیہ، بلدیاتی اداروں، سندھ سالڈ ویسٹ مینجمنٹ بورڈ، ٹریفک پولیس اور ریسکیو اداروں سمیت تمام متعلقہ محکموں کو ہدایت کی کہ باہمی تعاون کے ساتھ کام کریں۔

انہوں نے زور دیا کہ عوام کی حفاظت حکومت کی اولین ترجیح ہے اور کسی بھی قسم کی غفلت کو ہرگز برداشت نہیں کیا جائے گا۔ انہوں نے اضافی احتیاطی اقدامات کی بھی ہدایت کی، جن میں نشیبی علاقوں میں ڈی واٹرنگ پمپس اور عملے کو الرٹ رکھنا، بجلی کے خطرات والے مقامات پر وارننگ بورڈز نصب کرنا، 24گھنٹے فعال کنٹرول رومز قائم رکھنا اور میڈیا کے ذریعے بروقت عوام کو معلومات فراہم کرنا شامل ہیں۔

انہوں نے شہریوں سے اپیل کی کہ بارش کے دوران غیر ضروری سفر سے گریز کریں اور متعلقہ حکام سے تعاون کریں تاکہ ممکنہ خطرات کو کم کیا جا سکے۔انہوں نے کہا کہ سندھ حکومت مون سون کی بارشوں سے پیدا ہونے والی مشکلات کو کم کرنے اور شہریوں کے جان و مال کا تحفظ یقینی بنانے کے لیے تمام ممکنہ اقدامات جاری رکھے ہوئے ہے۔