Live Updates

مون سون کے رنگ،اسلام آباد اور لاہور سمیت پنجاب کے مختلف علاقوں میں تیز بارش

قصور، پاکپتن، کمالیہ، چنیوٹ، جھنگ، ننکانہ ، وہاڑی، عبدالحکیم، چشتیاں، منڈی صادق آباد، منچن آباد، سرگودھا اور کندیاں میں بارش

منگل 15 جولائی 2025 13:42

مون سون کے رنگ،اسلام آباد اور لاہور سمیت پنجاب کے مختلف علاقوں میں ..

اسلام آباد،لاہور(اُردو پوائنٹ اخبارتازہ ترین - این این آئی۔ 15 جولائی2025ء)مون سون کے رنگ برقرار،اسلام آباد اور لاہور سمیت پنجاب کے مختلف علاقوں میں منگل کی صبح سویرے تیز بارش ہوئی۔لاہور کے مختلف علاقوں مسلم ٹاؤن، کلمہ چوک، بیدیاں روڈ، گلبرگ، کینٹ اور ایئر پورٹ کے اطراف میں خوب بارش ہوئی۔اس کے علاوہ پنجاب کے مختلف شہروں قصور، پاکپتن، کمالیہ، چنیوٹ، جھنگ، ننکانہ صاحب، وہاڑی، عبدالحکیم، چشتیاں، منڈی صادق آباد، منچن آباد، سرگودھا اور کندیاں میں بادل برس پڑے، بصیر پور میں بارش کے باعث مکان کی چھت گرنے سے ایک شخص زخمی ہوگیا۔

آزاد کشمیر کے مختلف مقامات پر بھی وقفے وقفے سے بارش سے حبس میں کمی اور گرمی کا زور ٹوٹ گیا۔محکمہ موسمیات کے مطابق 17 جولائی تک ملک کے بعض مقامات پر شدید بارشوں کا امکان ہے، اسلام آباد، پنجاب، خیبرپختونخوا، سندھ اور شمال مشرقی بلوچستان کے مختلف علاقوں میں ندی نالوں میں طغیانی کا خطرہ ہے جبکہ پہاڑی علاقوں میں لینڈ سلائیڈنگ کا خدشہ ہے۔

(جاری ہے)

واضح رہے کہ این ڈی ایم اے نے بارشوں سے ہونے والے نقصانات پر رپورٹ جاری کر دی، ملک بھر میں مون سون بارشوں سے 111 افراد زندگی کی بازی ہار چکے، پنجاب میں 40، خیبر پختونخوا میں 37 افراد نے دم توڑا، سندھ میں 17، بلوچستان میں 16، آزاد کشمیر میں 1 شہری جان سے گیا۔این ڈی ایم اے نے اموات کی سب سے بڑی وجہ مکانوں کا گرنا قرار دیا گیا، مون سون بارشوں کے دوران مختلف حادثات میں 212 افراد زخمی بھی ہوئے،111 کا تعلق پنجاب اور 55 کا خیبر پختونخوا سے ہے، مجموعی طور پر 463 گھروں اور 9 پلوں کو نقصان پہنچا۔اس کے علاوہ خیبرپختونخوا میں تورغر، چترال اور کوہستان کی سڑکیں متاثر ہوئیں۔