ڈاکٹرمصدق ملک سے SPAR6C وفد کی ملاقات، آرٹیکل 6 تعاون پر پیش رفت کا جائزہ

منگل 15 جولائی 2025 16:44

اسلام آباد (اُردو پوائنٹ اخبارتازہ ترین - اے پی پی۔ 15 جولائی2025ء) وفاقی وزیر برائے موسمیاتی تبدیلی و ماحولیاتی ہم آہنگی ڈاکٹر مصدق ملک سے ملٹی کنٹری پراجیکٹ ’’سپار 6 سی‘‘ ( SPAR6C )کے ایک اعلیٰ سطحی وفد نے ملاقات کی ہے۔ سپار 6 سی‘‘ عالمی منصوبہ اقوامِ متحدہ کے ماحولیاتی پروگرام (یو این ای پی) کے تحت تشکیل دیا گیا ہے جس کا مقصد پاکستان سمیت دیگر شراکت دار ممالک کو بین الاقوامی کاربن مارکیٹس میں موثر شمولیت کے لیے درکار استعداد فراہم کرنا ہے۔

وزارت موسمیاتی تبدیلی و ماحولیاتی ہم آہنگی کے مطابق یہ پانچ سالہ پروگرام پاکستان، کولمبیا، تھائی لینڈ اور زیمبیا میں آرٹیکل 6 کے تقاضوں کے مطابق تیاری اور عملی اقدامات کی معاونت کر رہا ہے۔ملاقات کے دوران پاکستان میں آرٹیکل 6 کے تحت تیاری کے مختلف پہلوؤں پر تبادلہ خیال کیا گیا اور بالخصوص طلباء کے لیے جاری معاونتی پروگرام کے امکانات پر بھی غور کیا گیا۔

(جاری ہے)

اس ضمن میں ان پاکستانی طلباء کی صلاحیتوں کو قومی سطح پر بروئے کار لانے پر تبادلہ خیال ہوا جنہوں نے آرٹیکل 6 کے حوالے سے تحقیق اور تربیت مکمل کی ہے۔شرکاء نے پاکستان میں جاری اور آئندہ ممکنہ کاربن ٹریڈنگ منصوبوں اور دیگر مواقع کا بھی جائزہ لیا۔اس موقع پر وفاقی وزیر نے پاکستان میں ایک مضبوط، شفاف اور جامع کاربن مارکیٹ کے قیام کے لیے وزارت کے عزم کا اعادہ کیا۔ انہوں نے کہا کہ سپار 6 سی جیسے بین الاقوامی ترقیاتی شراکت داروں کے ساتھ قریبی تعاون کے ساتھ ساتھ ملکی نجی شعبے کو بھی اس عمل میں شریک کیا جائے گا تاکہ قومی موسمیاتی اہداف کے حصول اور پائیدار معاشی ترقی کو یقینی بنایا جا سکے۔