پنجاب میں فری لانسرز کیلئے انٹرنیشنل سرٹیفکیشن پروگرام، سکولوں میں ایڈ ٹیک، میٹرک پائلٹ پراجیکٹ کا آغاز ہوچکا‘مریم نواز

منگل 15 جولائی 2025 20:13

لاہور (اُردو پوائنٹ اخبارتازہ ترین - این این آئی۔ 15 جولائی2025ء) وزیراعلیٰ پنجاب مریم نواز شریف نے کہا ہے کہ حکومت نوجوانوں کو بااختیار بنانے کی راہ میں انقلابی اقدام کررہی ہے،پنجاب میں فری لانسرز کے لئے انٹرنیشنل سرٹیفکیشن پروگرام شروع کیا ہے، سرکاری سکولوں میں ایڈ ٹیک، میٹرک پائلٹ پراجیکٹ شروع ہوچکا ہے، زراعت، ماحولیات سمیت ہر سرکاری محکمے میں انٹرن شپ کا آغاز کیا ہے۔

وزیر اعلیٰ مریم نواز شریف نے نوجوانوں کی سکلز کے عالمی دن پر اپنے پیغام میں کہا کہ زمانہ بدل چکا ہے آج کی دنیا تعلیم کے ساتھ ہنر کی بھی طالب ہے۔ ڈگری نہیں بلکہ ہنر ہی وہ طاقت ہے جو قوموں کی تقدیر بدل دیتی ہے۔ مہارت صرف روزگار کا ذریعہ نہیں بلکہ خود اعتمادی اور قومی ترقی کی ضمانت ہے۔

(جاری ہے)

وزیراعلیٰ مریم نواز شریف نے کہا کہ دور حاضر میں ہنر ہی ترقی کی کلید ہے۔

نوجوانوں کو آئی ٹی اسکلز فراہم کی جا رہی ہیں جو اس وقت کا سب سے بڑا ٹول ہیں۔ نواز شریف آئی ٹی سٹی نوجوانوں کی سکلز کو پلیٹ فارم اور تقویت دے گا۔ ٹیوٹا پنجاب کے نوجوانوں کو جدید دور کی ضرورتوں کے مطابق تربیت دے رہا ہے۔ وزیراعلیٰ مریم نواز شریف نے کہا کہ میرا عزم ہے کہ ہر نوجوان کے ہاتھ میں کوئی نہ کوئی ہنر ضرور ہو۔ مہارت روزگار کا راستہ ہی نہیں بلکہ عزت اور ترقی کی ضمانت ہے۔ میرا خواب ہے کہ پنجاب کا نوجوان نوکری کا طلب گار نہیں بلکہ روزگار دینے کے قابل ہو۔ مشن ہے کہ ہمارے نوجوان فری لانسنگ سے لے کر انٹرپرینیور شپ تک ہر میدان میں کامیاب ہوں۔