16 لاکھ سے زائد کاروباری افراد کا ملک چھوڑ جانے کا انکشاف

تاجر برادری میں مزید ٹیکس ادا کرنے کی سکت بالکل نہیں، کاروباری طبقے کی تذلیل کسی صورت برداشت نہیں کریں گے، صدر آل پاکستان انجمن تاجران

محمد علی منگل 15 جولائی 2025 20:52

لاہور (اُردو پوائنٹ اخبارتازہ ترین۔ 15 جولائی2025ء) 16 لاکھ سے زائد کاروباری افراد کا ملک چھوڑ جانے کا انکشاف۔ تفصیلات کے مطابق ایف بی آر قوانین کے خلاف آل پاکستان انجمن تاجران نے ملک گیر احتجاج کا اعلان کر دیا۔صدر آل پاکستان انجمن تاجران اجمل بلوچ نے ایک بیان میں کہا کہ ایف بی آر قوانین کے خلاف 26 جولائی کو ملک کے کونے کونے ہر ضلع و تحصیل میں احتجاج ہوگا۔

انہوں نے کہا کہ سیل ٹیکس ایکٹ کی شق 37 (اے ای)، 37 (بی)، 21 (ایس) فوری طور پر واپس لی جائیں، اسی طرح 21 ایس کیش ٹرانزیکشن پر 20 فیصد ٹیکس کسی صورت نہیں مانتے۔اجمل بلوچ نے کہاکہ 25 صفحات پر مبنی انکم ٹیکس گوشوارہ بھی قبول نہیں، ڈیجیٹل انوائسنگ تاجر پر بوجھ اور کرپشن کی نئی راہ کھولے گی، ڈیجیٹل انوائسنگ کرپشن کے علاوہ 6 لاکھ روپے سالانہ اضافی بوجھ بھی پڑے گا۔

(جاری ہے)

صدر آل پاکستان انجمن تاجران نے کہا کہ کاروباری طبقے کی تذلیل کسی صورت برداشت نہیں کریں گے، 16 لاکھ سے زائد کاروباری لوگ ملک چھوڑ چکے ہیں۔اجمل بلوچ نے کہا کہ سیل ٹیکس کے بے ہودہ قوانین مشکلات کے سوا کچھ نہیں، پوائنٹ آف سیل ڈیوائس ایک منتھلی کرپشن فارمولا ہے، ٹیکس وصولی کا آدھا کرپشن کی نظر ہو رہا ہے۔انہوں نے کہا کہ تاجر برادری میں مزید ٹیکس ادا کرنے کی سکت بالکل نہیں، مفت پیٹرول ، بجلی گیس اور مراعات فوری ختم کی جائیں۔اجمل بلوچ نے کہا کہ وزیروں مشیروں کی بڑھائی گئی تنخواہیں واپس کی جائیں، ابھی بھی وقت ہے اسٹیک ہولڈرز کے ساتھ بیٹھ کر بات کر لی جائے۔