ذلفی بخاری بانی پی ٹی آئی کیلئے کام نہیں کر رہے

اسٹیبلشمنٹ کی جانب سے ذلفی بخاری کو ایک متفقہ پی ٹی آئی لیڈر کے طور پر لانچ کیا جا رہا ہے، روبینہ خان کاایک بار پھر الزام

منگل 15 جولائی 2025 22:15

ذلفی بخاری بانی پی ٹی آئی کیلئے کام نہیں کر رہے

اسلام آباد(اُردو پوائنٹ اخبارتازہ ترین - این این آئی۔ 15 جولائی2025ء)بانی پی ٹی آئی کی بڑی بہن روبینہ خان نے تحریک انصاف کے رہنما ذلفی بخاری پر ایک بار پھر الزامات عائد کیے ہیں۔جاری بیان میں انہوں نے کہا کہ اسٹیبلشمنٹ کی جانب سے ذلفی بخاری کو ایک متفقہ پی ٹی آئی لیڈر کے طور پر لانچ کیا جا رہا ہے، کئی مہینے منظر سے غائب رہنے کے بعد کیا یہ دھوکے باز آدمی اب وژن فراہم کرے گا ۔

روبینہ خان نے کہا کہ ذلفی بخاری نے سیاحت اور پارٹی ترجمانی کے دوران کوئی کارکردگی نہیں دکھائی، یہ بین الاقوامی مشیر کے طور پرگِھسے پٹے بیانات دیتا تھا جن میں کوئی ٹھوس بات نہیں ہوتی۔انہوں نے کہا کہ ذلفی بخاری انسانی حقوق کیس میں ناکام ہوا، فیصلے کے بعد کوئی سفارتی حکمت عملی نہ بنائی، ہر شخص کو یہ سوال اٹھانا چاہیے کہ یہ اصل میں کس کے لیے کام کر رہا ہے۔

(جاری ہے)

روبینہ خان نے الزام عائد کیا کہ یہ بات طے ہے کہ وہ بانی پی ٹی آئی کیلئے کام نہیں کر رہا، میں نے پوچھا کہ برطانیہ میں پاکستان میں انسانی حقوق کے خلاف ورزیوں پر زیادہ کوریج کیوں نہ حاصل کر سکی ۔ان کے مطابق ذلفی نے کہا کہ برطانیہ میں بانی پی ٹی آئی میں کوئی دلچسپی نہیں ہے، یہ 2023 کی بات ہے۔دوسری جانب ذلفی ذلفی بخاری کے قریبی ذرائع نے روبینہ خان کے الزامات کو بے بنیاد قرار دے کرمسترد کردیا۔