ڈی ایف پی کا مقبوضہ کشمیر میں مزید 20بٹالین کی تعیناتی پر گہری تشویش کا اظہار

جمعرات 17 جولائی 2025 16:39

سری نگر(اُردو پوائنٹ اخبارتازہ ترین - این این آئی۔ 17 جولائی2025ء)بھارت کے زیر قبضہ جموں و کشمیر میں ڈیموکریٹک فریڈم پارٹی (ڈی ایف پی) نے بھارتی پیراملٹری سینٹرل ریزرو پولیس فورس کی مزید20بٹالین کی علاقے میں تعیناتی پر گہری تشویش کا اظہار کرتے ہوئے اسے غیر قانونی قبضے کو مزید مضبوط کرنے کا ایک اور اقدام قرار دیا ہے۔کشمیرمیڈیاسروس کے مطابق ڈی ایف پی کے ترجمان ایڈووکیٹ ارشد اقبال نے سرینگر میں جاری ایک بیان میں کہا کہ مزید فورسز اہلکاروں کو مقبوضہ علاقے میں بھیجنے کا فیصلہ مودی حکومت کے مذموم عزائم کا پتہ دیتا ہے ۔

انہوںنے کہا کہ علاقے میں پہلے ہی دس لاکھ سے زائد بھارتی فورسز اہلکار تعینات ہیں جنہوںنے کشمیریوں کی زندگی اجیرن بنا رکھی ہے۔انہوںنے کہا کہ بھارتی حکومت ایک طرف مقبوضہ علاقے میں حالات معمول پر لانے کا دعویٰ کر رہی ہے ، اگر وہ اپنے دعوے میںدرست ہے تو مزید فوجی علاقے میں بھیجنے کی کیا ضرورت ہے۔

(جاری ہے)

ترجمان نے کہا کہ بھارت تنازعہ کشمیر کو پر امن طریقے اور کشمیریوں کی امنگوں کے مطابق حل کرنے کے بجائے جارحیت اور فوجی طاقت کے استعمال کی پالیسی پر مسلسل عمل پیرا ہے۔

انہوں نے کہا کہ بھارتی حکمرانوں کو تاریخ سے سبق سیکھنا چاہیے کہ طاقت کے وحشیانہ استعمال اور جابرانہ ہتھکنڈوں سے قوموں کی جائز خواہشات کو دبایا نہیںجاسکتا۔دریں اثنا، ڈی ایف پی کے ترجمان نے ’’یوم شہدائے کشمیر ‘‘پر قابض حکام کے جابرانہ اقدامات کی شدید مذمت کی۔ انہوں نے کہا کہ ایسی بزدلانہ کارروائیوں سے بھارت کشمیریوں کے جذبہ حریت کو ہرگز دبا نہیں سکتا۔