Live Updates

علیمہ خان اسلام آباد میں ہونے کی وجہ سے نیشنل سائبر کرائم انویسٹی گیشن ایجنسی کے نوٹس پر پیش نہ ہوئیں

جمعرات 17 جولائی 2025 18:09

لاہور(اُردو پوائنٹ اخبارتازہ ترین - این این آئی۔ 17 جولائی2025ء) پاکستان تحریک انصاف کے بانی عمران خان کی ہمشیرہ علیمہ خان اسلام آباد میں ہونے کی وجہ سے نیشنل سائبر کرائم انویسٹی گیشن ایجنسی کے نوٹس پر پیش نہ ہوئیں تاہم ان کے وکیل رانا مدثر عمر پیش ہو گئے ۔میڈیا سے گفتگو کرتے ہوئے انہوں نے کہا کہ علیمہ خان کو رات گئے ایک نوٹس موصول ہوا جس کے مطابق انہیں صبح 11 بجے طلب کیا گیا تھا حالانکہ وہ اس وقت اسلام آباد میں موجود تھیں۔

رانا مدثر کے مطابق 3 جون کو پہلا نوٹس جاری ہوا جس کی اطلاع انہیں صرف سوشل میڈیا کے ذریعے ملی، جب انہوں نے تفتیشی افسر سے رابطہ کیا تو معلوم ہوا کہ وہ افسر اسلام آباد میں ہے اور نوٹس پر درج پتہ بھی غلط تھا۔15 جون کو جاری ہونے والے دوسرے نوٹس پر بھی غلط پتہ درج تھا جس کے باعث وہ وقت پر رسائی حاصل نہ کر سکے۔

(جاری ہے)

تفتیشی افسر نے کہا تھا کہ درست پتہ لکھ کر دوبارہ نوٹس بھیجا جائے گا۔

وکیل کے مطابق تیسرا نوٹس بھی تاخیر سے ملا اور وہ بھی میڈیا کے ذریعے موصول ہوا جس کے بعد انہوں نے جواب جمع کروا دیا۔ انہوںنے کہا کہ30 جون کو علیمہ خان خود پیش ہوئیں لیکن تفتیشی افسر دستیاب نہ تھے۔انہوں نے محرر سے درخواست کی کہ انہیں الزامات کی تفصیلات اور درخواست کی کاپی دی جائے۔آئین کے آرٹیکل 10اے کے تحت ہر شہری کو منصفانہ ٹرائل کا حق حاصل ہے اور یہی وہ مانگ رہے ہیں۔

انہوں نے بتایا کہ تفتیشی افسر آج بھی موجود نہیں جبکہ ایک سینئر افسر نے کہا ہے کہ وہ معاملہ دیکھیں گے۔ وکیل کے مطابق نوٹس میں علیمہ خان پر ریاست مخالف سرگرمیوں کا الزام ہے ،سائبر پٹرولنگ کے دوران از خود کارروائی کی گئی کسی شہری نے باقاعدہ شکایت درج نہیں کرائی۔وکیل نے مزید بتایا کہ نیشنل سائبر کوارڈی نیشن کمیٹی کی جانب سے کہا گیا ہے کہ علیمہ خان کی ایک یا ایک سے زیادہ ویڈیوز بھی ہو سکتی ہیں تاہم اس حوالے سے اب تک کوئی تفصیل فراہم نہیں کی گئی۔تفتیشی افسر کی عدم دستیابی پر سینئرافسر نے یقین دہانی کرائی ہے کہ ان کی دستیابی سے متعلق جلد آگاہ کیا جائے گا۔