حریت کانفرنس کی اقوام متحدہ سے مسئلہ کشمیر کے حل کیلئے کردار ادا کرنے کی اپیل

جمعرات 17 جولائی 2025 19:15

سرینگر (اُردو پوائنٹ اخبارتازہ ترین - این این آئی۔ 17 جولائی2025ء)بھارت کے زیر قبضہ جموںوکشمیر میں حریت رہنماؤں اور تنظیموں نے اقوام متحدہ پر زور دیا ہے کہ وہ بھارتی مظالم کو روکنے اور تنازعہ کشمیر کو اپنی متعلقہ قراردادوں اور کشمیری عوام کی امنگوں کے مطابق حل کرانے کیلئے کردار ادا کرے۔ کشمیرمیڈیاسروس کے مطابق حریت رہنمائوں اور تنظیموں نے سرینگر میں جاری اپنے بیانات میں کہا کہ مقبوضہ جموں وکشمیر کے عوام علاقے میں تعینات 10لاکھ سے زائد بھارتی فوجیوں کی طرف سے پھیلائے جانے والے خوف ودہشت کے ماحول میں زندگی گزار رہے ہیں۔

انہوںنے کہا کہ مودی حکومت نے مقبوضہ جموںوکشمیر کو ایک بڑے فوجی کیمپ میں تبدیل کر کے کشمیریوں کے تمام بنیادی حقوق سلب کررکھے ہیں، بی جے پی کی فرقہ پرست بھارتی حکومت نے کشمیریوں کے آزادی کے جائز مطالبے کو دبانے کے لیے فورسز کو ان پر طاقت کے وحشیانہ استعمال کی کھلی چھٹی دے رکھی ہے۔

(جاری ہے)

انہوں نے کہا کہ بھارتی فورسز نے محاصرے اور تلاشی کی کارروائیوں، گھروں پر چھاپوں اور بڑے پیمانے پر گرفتاریوں کے ذریعے کشمیریوں کا جینا دو بھر کر رکھا ہے ۔

بے گناہ کشمیریوں خاص طور پر نوجوانوں کو پبلک سیفٹی ایکٹ اور یو اے پی اے جیسے کالے قوانین کے تحت گرفتار کر کے جیلوں اور عقوبت خانوںمیں ڈالا جاتا ہے۔ حریت رہنمائوں اور تنظیموں نے کہا کہ بھارت کی تمام تر چیرہ دستیوں کے باوجود کشمیریوں کے حوصلے بلند ہیں اور وہ اپنے شہداء کے عظیم مشن کو اسکے منطقی انجام تک پہنچانے کیلئے پرعزم ہیں۔انہوںنے واضح کیا کہ مسئلہ کشمیر کے حل کے بغیر خطے میں پائیدار امن وترقی کا خواب کبھی پورا نہیں ہوسکتا لہذ عالمی برادری بالخصوص اقوام متحدہ کو چاہیے کہ وہ اس مسئلے کے حل کیلئے کردار ادا کریں۔