Live Updates

اسلام آباد اور راولپنڈی میں سیلاب کی ویڈیوز وائرل

پاک فوج کی جانب سے پھنسے لوگوں کو نکالنے کی ویڈیوز سامنے آئیں

جمعرات 17 جولائی 2025 19:50

اسلام آباد (اُردو پوائنٹ اخبارتازہ ترین - این این آئی۔ 17 جولائی2025ء)وفاقی دارالحکومت حکومت اسلام آباد اور اس کے جڑواں شہر راولپنڈی میں 16 اور 17 جولائی کی درمیانی شب مسلسل تیز بارشوں کے بعد سیلابی صورتحال پیدا ہوگئی۔محکمہ موسمیات کے مطابق راولپنڈی میں 15 گھنٹوں کے دوران 230 ملی میٹر بارش ریکارڈ ہوئی جب کہ چکوال میں بادل پھٹنے کے بعد 423 ملی میٹر بارش ریکارڈ کی گئی۔

اسلام آباد، راولپنڈی، چکوال اور گرد و نواح کے شہروں اور علاقوں میں مسلسل بارش کے بعد سیلابی صورت حال پیدا ہوگئی اور رہائشی علاقے بھی زیر آب آگئے۔بارش اور سیلاب کے بعد اسلام آباد، راولپنڈی اور چکوال کی متعدد ویڈیوز اور تصاویر سوشل میڈیا پر وائرل ہوگئیں، جن میں پانی کو عبادت گاہوں سمیت گھروں میں بھی داخل ہوتے دیکھا جا سکتا ہے۔

(جاری ہے)

اسلام آباد اور راولپنڈی کے متعدد روڈز اور کاروباری علاقے بھی زیر آب آگئے ۔ رپورٹ کے مطابق موٹر وے پر بھی پانی کھڑا ہوگیا، دوسری جانب اسلام آباد میں انڈر پاس اور فلائی اوورز کے قریب روڈوں کے بیٹھ جانے کی ویڈیوز بھی وائرل ہوگئیں۔شدید بارشوں کے بعد سیلاب آنے کی متعدد ویڈیوز میں صارفین کی جانب سے بے بنیاد دعوے بھی کیے گئے، جس سے لوگوں میں خوف بھی پھیل گیا۔سیلاب ریلے آنے کے بعد متعدد علاقوں میں درجنوں افراد کے پھنس جانے کی ویڈیوز بھی وائرل ہوگئیں جبکہ پاک فوج کی جانب سے پھنسے لوگوں کو نکالنے کی ویڈیوز سامنے آئیں۔