لاہور اور فیصل آباد میں طیاروں سے پرندے ٹکرا گئے، پروازیں حادثے سے بال بال بچ گئیں

لاہور(اردوپوائنٹ اخبار تازہ ترین۔19جولائی 2025)لاہور اور فیصل آبادمیں طیاروں سے پرندے ٹکرا گئے،دونوں پروازیں حادثے سے بال بال بچ گئیں، دونوں واقعات میں تمام مسافر محفوظ رہے،واقعے کے بعد پروازیں تاخیر کا شکار ہوگئیں،لاہور میں نجی ائیرلائن کی کراچی جانے والی پرواز جبکہ فیصل آباد میں دبئی سے آنے والی فلائٹ پرندوں سے ٹکرا گئی بتایاگیاہے کہ لاہور ایئرپورٹ پر نجی ائیرلائن کی پرواز جیسے ہی رن وے پر ٹیک آف کی تیاری میں تھی اچانک ایک پرندہ سامنے سے آ کر طیارے سے ٹکرا گیا۔

واقعے کے فوراً بعد جہاز کو واپس پارکنگ پر منتقل کر دیا گیا اور انجینئرز نے جہاز کا مکمل معائنہ شروع کر دیا۔دوسری جانب فیصل آباد ایئرپورٹ پر دبئی سے آنے والی پرواز کے انجن سے پرندہ ٹکرا گیا جس کے باعث انجن میں تکنیکی خرابی پیدا ہوئی۔

(جاری ہے)

پائلٹ نے انتہائی مہارت سے طیارے کو بحفاظت لینڈ کروایا۔ تمام مسافر خیریت سے محفوظ رہے۔ واضح رہے کہ چند روز قبل بھی لاہور سے اسکردو کی نجی ایئر کی پرواز سے پرندہ ٹکرا گیاتھا۔

پرندہ ٹکرانے سے طیارے کے انجن نمبر 2 کے دو بلیڈ متاثر ہوئے تھے۔پرندہ ٹکرانے کے بعد طیارے کو واپس لینڈ کرالیا گیا۔ اس حوالے سے نجی ایئر کے ترجمان کا کہنا تھا کہ پرواز پی اے 481 کو لاہور سے ٹیک آف کرتے ہوئے برڈ اسٹرائیک کا سامنا ہوا۔ترجمان کے مطابق پرواز کو فوری طور پر لاہور واپس اتار لیا گیا ہے اور 149 مسافروں کو اف لوڈ کردیا گیا تھا۔

ایئر لائن کے ترجمان کامزید کہناتھاکہ لاہور سے اسکردو کیلئے پرواز پی اے 481 کو منسوخ کردیا گیا تھا۔چند روزقبل وزیر اعلیٰ پنجاب مریم نواز کی ہدایت پر صوبے کی فضائی حدود میں مسافر طیاروں کی حفاظت کیلئے اہم اقدام اٹھا یاگیاتھا۔وزیر اعلیٰ پنجاب نے مسافر جہازوں کی حفاظت کیلئے گرینڈ آپریشن کرنے اور سینئر صوبائی وزیر مریم اورنگزیب کو پنجاب کی پہلی وائلڈ لائف فورس کو متحرک کرنے کی ہدایت کی تھی۔

محفوظ فضائی سفر کیلئے مریم نواز کی ہدایت پر ڈسٹرکٹ ایڈمنسٹریشن وائلڈ لائف اور انوائرمنٹ پروٹیکشن اتھارٹی کو متحرک کر دیا گیا تھا۔ لاہور کے مختلف علاقوں کو ’نو برڈ زون‘ بنانے کیلئے رنگ فینسنگ (فضائی حفاظتی حصار بنانے) کا فیصلہ کیا گیاتھا۔اس سلسلے میں جاری کئے گئے نوٹیفکیشن میں بتایاگیاتھاکہ ماحولیاتی حفاظتی انتظامات کے بغیر قائم پولٹری فارمز، بیکریوں اور ذبح خانوں پر پابندی لگائی جائے گی۔

چمڑا رنگنے اور چمڑے سے اشیا بنانے والی کمپنیوں پر ماحولیاتی ضابطوں کا سخت اطلاق ہوگا۔ ہوائی اڈوں کے قریب کوڑا کرکٹ پھینکنے پر مکمل پابندی ہوگی، ڈھکن والے کوڑے دانوں کا استعمال لازمی قرار دیا گیاتھا۔نوٹیفکیشن کے مطابق وائلڈ لائف رینجرز کو آپریشن شروع کرنے کا حکم مل گیا، ایئرپورٹس کے قریب پرندوں کو جمع ہونے والی وجوہات ختم کی جائیں گی، وائلڈ لائف رینجرز، ضلعی انتظامیہ اور متعلقہ ادارے کارروائی کریں گے اور قانون پر سختی سے عمل درآمد کروایا جائے گا۔ خلاف ورزی پر گرفتاریاں، سزائیں اور جرمانے ہوں گے۔ ہوائی اڈوں کے قریب کچرے کے ڈھیر جمع ہونے کا خاتمہ یقینی بنایا جائے گا۔