Live Updates

سیلابی پانی کے کٹاؤ کے باعث بریچنگ کا خدشہ، موٹروے ایم فائیو ہر قسم کی ٹریفک کیلئے بند

پی ڈی ایم اے پنجاب، این ایچ اے اور متعلقہ انتظامیہ موٹروے کے بچا کے لیے اقدامات کر رہے ہیں، موٹروے کو بڑے کٹاؤ سے بچانے کے لیے سینڈ بیگ اور پتھر استعمال کیے جا رہے ہیں؛ ڈی جی پی ڈی ایم اے عرفان کاٹھیا

ساجد علی اتوار 14 ستمبر 2025 17:25

سیلابی پانی کے کٹاؤ کے باعث بریچنگ کا خدشہ، موٹروے ایم فائیو ہر قسم ..

لاہور ( اُردو پوائنٹ اخبارتازہ ترین۔ 14 ستمبر2025ء ) سیلابی پانی کے کٹاؤ کے باعث بریچنگ کے خدشہ کے پیش نظر موٹروے ایم فائیو ہر قسم کی ٹریفک کیلئے بند کردی گئی۔ تفصیلات کے مطابق پروونشل ڈیزاسٹر مینجمنٹ اتھاڑٹی کے ڈائرکٹر جنرل عرفان علی کاٹھیا نے کہا ہے کہ جلال پور پیر والا کے مقام پر ایم فائیو موٹروے کو ہر قسم کی ٹریفک کے لیے بند کر دیا گیا ہے کیوں کہ سیلابی پانی کے کٹاؤ کے باعث موٹروے میں بریچنگ کا خدشہ ہے۔

انہوں نے کہا کہ پی ڈی ایم اے پنجاب، این ایچ اے اور متعلقہ انتظامیہ موٹروے کے بچا کے لیے اقدامات کر رہے ہیں، موٹروے کو بڑے کٹاؤ سے بچانے کے لیے سینڈ بیگ اور پتھر استعمال کیے جا رہے ہیں، آئندہ 24 گھنٹوں میں جلال پور پیر والا میں سیلابی پانی میں واضح کمی ہو جائے گی، پنجاب کے دریاؤں میں پانی کے بہاو میں تیزی سے کمی ہو رہی ہے، پنجند کے مقام پر پانی کا بہاؤ کم ہو کر 3 لاکھ 92 ہزار ہو گیا ہے، گڈو بیراج کے مقام پر پانی کا بہاؤ 6 لاکھ 27 ہزار کیوسک ہے۔

(جاری ہے)

ترجمان موٹروے سید عمران احمد کا کہنا ہے کہ سیلاب کے باعث جلالپور پیر کے قریب موٹروے ایم 5 کے متاثر ہونے کا اندیشہ ہے، روڈیوزرز کی حفاظت کے لیے ایم 5 کو جلالپور کے قریب ٹریفک کے لیے بند کیا جارہا ہے، موٹروے پولیس ٹریفک کو متبادل راستوں سے گزار رہی ہے، این ایچ اے احکام کی درخواست پر ٹریفک کے لیے ڈائیورشنز لگا دی گئیں، ٹریفک نارتھ باؤنڈ پر اوچ شریف، جھانگرہ اور جلالپور انٹرچینج سے موڑی جارہی ہے، ساؤتھ باؤنڈ ٹریفک شاہ شمس، شیر شاہ اور شجاع آباد ساؤتھ سے متبادل راستوں پر منتقل کی گئی ہے، این ایچ اے کے ورکرز فلڈ واٹر سے بچاؤ کے لیے ریت کے تھیلے اور پتھر رکھ رہے ہیں جب کہ موٹروے پولیس روڈیوزر کی رہنمائی کے لیے موقع پر موجود ہے۔