ڈیجیٹل معیشت کی جانب انقلابی پیشرفت ،گزشتہ مالی سال کے اختتام پرآئی ٹی برآمدات کا حجم 3.8 ارب ڈالر کی بلند ترین سطح پر پہنچ گیا

اتوار 20 جولائی 2025 13:00

اسلام آباد (اُردو پوائنٹ اخبارتازہ ترین - اے پی پی۔ 20 جولائی2025ء) انفارمیشن ٹیکنالوجی (آئی ٹی ) کی قومی برآمدات میں تاریخی اضافہ جاری ہے، ڈیجیٹل معیشت کی جانب انقلابی پیشرفت کے تحت خصوصی سرمایہ کاری سہولت کونسل (ایس آئی ایف سی )اور وزارت آئی ٹی کی مشترکہ کوششوں سے آئی ٹی برآمدات میں ریکارڈ اضافہ ہو ا ہے اور گزشتہ مالی سال 2025 کے اختتام پرپاکستان کی آئی ٹی برآمدات 3.8 ارب ڈالر کی بلند ترین سطح پر پہنچ گئیں۔

وزارت آئی ٹی و ٹیلی کمونیکیشن کے حکام کے مطابق آئی ٹی، آئی ٹی ای ایس اور فری لانسر برآمدات میں 18 فیصد اضافہ ہوا ہے اور دنیا بھر میں پاکستان کی شناخت مستحکم ہوئی ہے۔ واضح رہے کہ وزیراعظم محمد شہباز شریف کی قیادت میں وزارت آئی ٹی کی جامع حکمت عملی نے آئی ٹی برآمدات میں نمایاں اضافہ ممکن بنایا ہے۔

(جاری ہے)

پاکستان کو عالمی سطح پر متعارف کرانے، ٹیلنٹ و انفراسٹرکچر میں سرمایہ کاری اور پالیسی معاونت پر توجہ مرکوز کی گئی ہے جس کے نتیجہ میں ڈیجیٹل معیشت، تیز انٹرنیٹ اور ڈیجیٹل ادائیگیوں کے فروغ سے قومی آئی ٹی سیکٹر میں انقلابی پیشرفت ہوئی ہے۔

پاکستان 2030 تک 15 ارب ڈالر کی آئی ٹی برآمدات کے ہدف کے حصول کی جانب گامزن ہے، ایس آئی ایف سی اور حکومت کے مؤثر اقدامات سےآئی ٹی برآمدات میں اضافہ ڈیجیٹل معیشت کے استحکام کا عکاس ہے۔