گورنر سندھ کو یہ نہیں کہنا چاہیے کہ میں مہاجر ہوں، ہم سب پاکستانی ہیں،نثار کھوڑو

گورنر سندھ آئے لیکن سندھی بستیوں میں نہیں گئے، گورنر کو ایسا نہیں کرنا چاہیے، وزیرِ اعلی آئے اداروں سے ملے، شہر کا چکر لگایا،صدر پی پی سندھ

اتوار 20 جولائی 2025 20:20

حیدرآباد(اُردو پوائنٹ اخبارتازہ ترین - این این آئی۔ 20 جولائی2025ء)پیپلز پارٹی سندھ کے صدر نثار کھوڑو نے کہا ہے کہ گورنر سندھ کو یہ نہیں کہنا چاہیے کہ میں مہاجر ہوں، ہم سب پاکستانی ہیں، مجھے افسوس ہے کہ گورنر نے اپنے ساتھ مہاجر لکھ دیا۔

(جاری ہے)

حیدرآباد میں پریس کانفرنس کرتے ہوئے نثار کھوڑو نے کہاکہ گورنر سندھ آئے لیکن سندھی بستیوں میں نہیں گئے، گورنر کو ایسا نہیں کرنا چاہیے، وزیرِ اعلی آئے اداروں سے ملے، شہر کا چکر لگایا۔

انہوں نے کہاکہ حکومت اور اپوزیشن کے معاہدے کے بعد سینیٹ الیکشن میں ہارس ٹریڈنگ نہیں ہو گی، سیاستدانوں پر ہارس ٹریڈنگ کے الزامات نہیں لگیں گے۔ نثار کھوڑو نے کہا کہ جس کی جو طاقت ہے اسے سیٹیں مل جائیں گی، پی ٹی آئی میں لیڈر شپ کی بات نہ ماننے سے پارٹی میں لیڈر شپ کرائسز ہے۔انہوں نے یہ بھی کہا کہ ملک میں سیاسی استحکام ہے، عدالتوں کے عمل سے حکومت کو زیادہ اکثریت مل گئی۔