گنڈاپور نے مخصوص نشستوں پر منتخب ارکان کی گورنر ہاؤس میں حلف برداری کو چیلنج کردیا

پیر 21 جولائی 2025 14:22

پشاور(اُردو پوائنٹ اخبارتازہ ترین - این این آئی۔ 21 جولائی2025ء)وزیراعلیٰ خیبر پختونخوا علی امین گنڈاپور نے مخصوص نشستوں پر ارکان کی گورنر ہاؤس میں حلف برداری کو چیلنج کردیا۔ایکسپریس نیوز کے مطابق مخصوص نشستوں پر منتخب ارکان اسمبلی سے گورنر ہاؤس میں حلف لینے کا معاملہ عدالت پہنچ گیا۔ وزیراعلیٰ خیبرپختونخوا علی امین گنڈاپور اور اسپیکر صوبائی اسمبلی نے ارکان کی گورنر ہاؤس میں حلف برداری کو پشاور ہائیکورٹ میں چیلنج کردیا۔

درخواست میں وفاقی حکومت، رجسٹرار پشاور ہائیکورٹ، گورنر، الیکشن کمیشن اور دیگر کو فریق بنایا گیا ہے۔درخواست میں مؤقف اختیار کیا گیا ہے کہ اسپیکر صوبائی اسمبلی نے ممبران سے حلف لینے سے انکار نہیں کیا۔ اسمبلی اجلاس شروع ہوا تو کورم کی نشان دہی پر اسپیکر نے اجلاس 24 جولائی تک ملتوی کیا، ایسے میں گورنر ہاؤس میں ارکان سے حلف لینا ماورائے آئین ہے۔

(جاری ہے)

پشاور ہائی کورٹ میں دائر درخواست میں مزید کہا گیا ہے کہ آئین کا آرٹیکل 65 ارکان اسمبلی سے حلف اسمبلی ہاؤس میں لینے کا کہتا ہے۔ آرٹیکل 255(2) میں impracticality (ناقابل عمل/ناممکن) لفظ لکھا ہے۔درخواست کے مطابق چیف جسٹس کے پاس آرٹیکل 255(2) کے تحت جوڈیشل اختیارات ہیں، انتظامی طور پر وہ اس کو نہیں دیکھ سکتے۔ وزیراعلیٰ، اسپیکر صوبائی اسمبلی انکار کریں تو پھر چیف جسٹس کسی کو نامزد کرے گا۔ ہمیں سننے کا موقع نہیں دیا گیا، چیف جسٹس نے گورنر کو حلف کے لیے نامزد کردیا۔واضح رہے کہ وزیراعلیٰ خیبر پختونخوا نے الیکشن کمیشن کی ہدایات پر اسمبلی اجلاس طلب کیا تھا۔