یووراج سنگھ میچ کھیلنا چاہتا تھا ، کھلاڑی کو ملک کا ’ایمبیسڈر‘ ہونا چاہیے ’ایمبیرسمنٹ‘ نہیں: شاہد آفریدی

جو ایک آدھ لڑکا نہیں کھیلنا چاہ رہا تھا اسکی وجہ سے سارا مسئلہ ہوا ، یہ بھارتی ٹیم کیلئے شرمندگی کا باعث ہے : سابق کپتان

ذیشان مہتاب پیر 21 جولائی 2025 15:53

یووراج سنگھ میچ کھیلنا چاہتا تھا ، کھلاڑی کو ملک کا ’ایمبیسڈر‘ ہونا ..

لاہور (اردو پوائنٹ تازہ ترین اخبار ۔ 21 جولائی 2025ء ) پاکستان کے سابق سٹار کرکٹر شاہد خان آفریدی نے تصدیق کی ہے کہ بھارتی کپتان یووراج سنگھ میچ کھیلنا چاہتے تھے لیکن ایک گندا انڈہ پورے کمرے کا ماحول خراب کر دیتا ہے ۔

تفصیلات کے مطابق بھارتی کھلاڑیوں کی ہٹ دھرمی کے باعث ورلڈ چیمپئن شپ آف لیجنڈز میں پاکستان اور بھارت کے سابق کرکٹرز کے درمیان شیڈول میچ گزشتہ روز منسوخ کر دیا گیا تھا جس پر اب شاہد آفریدی نے ایک صحافی کو دیئے گئے خصوصی انٹرویو میں بڑے انکشافات کر دیئے ہیں ۔

شاہد خان آفریدی کا کہنا تھا کہ ’’میں نے یہ بھی کہہ دیا تھاکہ آپ لوگ چاہتے ہو میں گراؤنڈ میں بھی نہیں آتا، کرکٹ ہونی چاہیے، مجھ سے کرکٹ بڑی ہے ، کرکٹ دونوں ٹیموں سے بڑی ہے ، آپ اپنے ملک کے سفارتکار بنیں ، شرمندگی نہ بنیں ، جو ایک آدھا لڑکا نہیں کھیلنا چاہ رہا تھا اس کی وجہ سے سارا مسئلہ ہوا ہے، میرے خیال میں یہ بھارتی ٹیم کیلئے شرمندگی کا باعث ہے ، بھارتی کپتان یووراج سنگھ ایک بہت ہی شاندار آل راؤنڈر ہے ، وہ یہ میچ کھیلنا چاہتے تھے ، وہ بھارتی کرکٹرز سے ناراض بھی ہیں، ڈبلیو سی ایل میں وہ بطور کپتان کردار ادا کر رہا ہے ، وہ کھیلنا چاہتا تھا اس لیے آیا ہے ، بس ایک گندا انڈہ پورے کمرے کا ماحول خراب کر دیتا ہے ۔

(جاری ہے)

‘‘

شاہد آفریدی نے تصدیق کی کہ یوراج سنگھ پاکستان کے خلاف میچ کھیلنا چاہتے تھے۔ یوراج سنگھ میچ کا بائیکاٹ کرنے والے بھارتی کھلاڑیوں سے سخت ناراض ہیں۔ 17,000 شائقین نے میچ کے ٹکٹ خریدے اور وہ سب بہت مایوس ہیں۔ کچھ ہندوستانی کھلاڑیوں میں بڑی انا ہے اور وہ خراب انڈے ہیں اور صرف تنازعہ… pic.twitter.com/tGDv9A2UlS
— Farid Khan (@_FaridKhan) July 21, 2025

یاد رہے کہ اتوار کو ایک بیان میں منتظمین نے کہا کہ ’’ہم نے بھارت بمقابلہ پاکستان میچ منسوخ کرنے کا فیصلہ کیا ہے‘‘، بیان کے مطابق یہ میچ دونوں ممالک کے درمیان کھیلوں کے تعلقات میں حالیہ بہتری کو مدنظر رکھتے ہوئے ترتیب دیا گیا تھا، اس تناظر میں بھارت اور پاکستان کے درمیان حالیہ والی بال میچ اور پاکستانی ہاکی ٹیم کے ممکنہ دورۂ بھارت کا حوالہ بھی دیا گیا۔

میچ کی منسوخی کا فیصلہ بھارتی سابق اوپنر شیکھر دھون کی جانب سے میچ سے دستبرداری کے بعد سامنے آیا، انہوں نے اپنے ایکس اکاؤنٹ پر ایک ای میل کا سکرین شاٹ شیئر کیا جس میں میچ نہ کھیلنے سے متعلق آگاہ کیا گیا تھا، ان کے بیان میں کہا گیا تھا کہ بھارت و پاکستان کے درمیان موجودہ جغرافیائی سیاسی صورتحال اور کشیدگی کے باعث وہ یہ میچ نہیں کھیل سکتے۔

بھارتی کھلاڑیوں کی ہٹ دھرمی کے باعث ورلڈ چیمپئن شپ آف لیجنڈز (ڈبلیو سی ایل) میں پاکستان اور بھارت کے سابق کرکٹرز کے درمیان طے شدہ ٹی ٹونٹی میچ منسوخ کر دیا گیا ہے۔

ڈبلیو سی ایل کی ویب سائٹ کے مطابق یہ لیگ بین الاقوامی سطح پر ریٹائرڈ اور نان کنٹریکٹڈ کھلاڑیوں کے لیے متعارف کرائی گئی ہے تاکہ وہ دوبارہ مسابقتی کرکٹ کھیل سکیں، یہ ٹورنامنٹ 18 جولائی کوانگلینڈ کے شہر برمنگھم میں شروع ہوا جو کہ 2 اگست تک جاری رہے گا۔

اس میں پاکستان، بھارت، انگلینڈ، آسٹریلیا، ویسٹ انڈیز اور جنوبی افریقہ کی ٹیمیں حصہ لے رہی ہیں، میچز برمنگھم، نارتھمپٹن، لیڈز اور لیسٹر میں کھیلے جائیں گے۔