بلوچستان میں دہشتگردی کے واقعات ، شام کے بعد پنجاب سے بلوچستان سفر پر پابندی عائد

سخی سرور اور بواٹہ میں تمام اقسام کی ٹرانسپورٹ سروسز عوامی اور نجی دونوں کو روزانہ شام 5 بجے تک اپنی کارروائیاں بند کرنی ہوں گی سفر صرف دن کی روشنی میں محدود ہے، یہ اقدام مسافروں کی جانوں کے تحفظ کیلئے کیا جا رہا ہے، ڈپٹی کمشنر ڈیرہ غازی خان

فیصل علوی منگل 22 جولائی 2025 11:35

بلوچستان میں دہشتگردی کے واقعات ، شام کے بعد پنجاب سے بلوچستان سفر ..

ڈیرہ غازی خان(اردوپوائنٹ اخبار تازہ ترین۔22جولائی 2025)بلوچستان میں حالیہ دہشتگردی کے واقعات کے پیش نظر حکومت نے شام کے بعد پنجاب سے بلوچستان سفر پر پابندی عائدکردی،اس حوالے سے باقاعدہ نوٹیفکیشن بھی جاری کر دیاگیا،جاری کردہ نوٹیفکیشن کے مطابق سخی سرور اور بواٹہ میں تمام اقسام کی ٹرانسپورٹ سروسز عوامی اور نجی دونوں کو روزانہ شام 5 بجے تک اپنی کارروائیاں بند کرنی ہوں گی۔

سفر صرف دن کی روشنی میں محدود ہے۔ رات کے وقت سفر کسی بھی صورت میں ممنوع ہے۔ڈپٹی کمشنرڈیرہ غازی خان عثمان خالد نے اعلان کیا ہے کہ شام 5 بجے کے بعد پنجاب سے بلوچستان جانے والی پبلک ٹرانسپورٹ کوبواٹہ چیک پوسٹ پرروک دیا جائے گا۔بلوچستان میں حالیہ مسافر قتل کے واقعے کے بعد حکومت نے سیکیورٹی خدشات کے پیش نظریہ اہم قدم اٹھایا ہے۔

(جاری ہے)

یہ اقدام مسافروں کی جانوں کے تحفظ کیلئے کیا جا رہا ہے۔

انہوں نے کہا کہ بلوچستان میں مسافروں کے قتل کے بعد حکومت نے احکامات جاری کئے ہیں لہٰذا ٹرانسپورٹرز شام کو سفر کرنے سے اجتناب کریں۔ڈی سی عثمان خالد کے مطابق ڈی جی خان سے شام 5 کے بعد کوئی بھی مسافر گاڑی بلوچستان داخل نہیں ہوسکے گی تاہم صبح 5 بجے کے بعد سفر جاری رکھ سکتے ہیں۔نوٹیفکیشن میں یہ کہاگیا ہے کہ تمام عوامی ٹرانسپورٹ گاڑیوں کو ڈی جی خان کے بس سٹینڈز پر روانگی سے قبل تمام مسافروں کی ویڈیو ریکارڈنگ کرنا لازمی ہوگا۔

نوٹیفکیشن میں خبردار کیا گیا ہے کہ کسی بھی خلاف ورزی کی صورت میں متعلقہ قوانین کے تحت فوری کارروائی کی جائے گی۔ضوابط کے مطابق ہر عوامی ٹرانسپورٹ بس کے ساتھ دو مسلح نجی سیکیورٹی گارڈز ہونا لازمی ہے اور روانگی سے قبل یہ شرط پوری کرنا ہوگی۔ ہر بس میں سی سی ٹی وی کیمرے نصب ہونے چاہئیں جو بس کے اندر اور باہر دونوں اطراف کی نگرانی کریں تاکہ سوار ہونے، اترنے اور سفر کے دوران کی سرگرمیوں کو مانیٹر کیا جا سکے۔

ہر عوامی ٹرانسپورٹ گاڑی میں ٹریکنگ سسٹم اور ایک ایمرجنسی پینک بٹن بھی نصب ہونا لازمی ہے۔ڈپٹی کمشنر ڈیرہ غازی خان نے ٹرانسپورٹروں اور شہریوں سے اپیل ہے کہ شام کے وقت سفرسے گریز کریں تاکہ کسی ناخوشگوار واقعہ سے بچا جا سکے۔ٹرانسپورٹرزاورشہریوں سے اپیل کی گئی ہے کہ شام کے وقت سفرسے گریزکریں تاکہ کسی ناخوشگوار واقعے سے بچا جا سکے۔