جنرل ساحر شمشاد مرزا سے تاجکستان کے چیف آف جنرل سٹاف کی ملاقات

میجر جنرل سعیدزودا کا دہشت گردی کیخلاف جنگ میں پاک افواج کی قربانیوں کا اعتراف

جمعہ 25 جولائی 2025 19:35

راولپنڈی (اُردو پوائنٹ اخبارتازہ ترین - این این آئی۔ 25 جولائی2025ء)چیئرمین جوائنٹ چیفس آف سٹاف کمیٹی جنرل ساحر شمشاد مرزا سے تاجکستان کے چیف آف جنرل سٹاف نے ملاقات کی، میجر جنرل سعیدزودا نے دہشت گردی کے خلاف جنگ میں پاک افواج کی قربانیوں کا اعتراف کیا۔آئی ایس پی آر کے مطابق جوائنٹ سٹاف ہیڈکوارٹرز راولپنڈی میں چیئرمین جوائنٹ چیفس آف اسٹاف کمیٹی جنرل ساحر شمشاد مرزا، نشانِ امتیاز (ملٹری)سے تاجکستان کے چیف آف جنرل اسٹاف آف دی آرمڈ فورسز اور پہلے نائب وزیر دفاع میجر جنرل سعیدزودا بوبوجون عبدالقادر نے ملاقات کی۔

(جاری ہے)

ملاقات میں علاقائی سیکیورٹی کی بدلتی ہوئی صورتحال اور باہمی اسٹریٹجک مفادات پر تبادلہ خیال کیا گیا، دونوں عسکری رہنماں نے پاکستان اور تاجکستان کے درمیان گہرے برادرانہ تعلقات کو اجاگر کیا اور دو طرفہ دفاعی تعاون کو مزید مضبوط بنانے کے امکانات پر گفتگو کی۔میجر جنرل سعیدزودا بوبوجون عبدالقادر نے پاکستان کی مسلح افواج کی پیشہ ورانہ صلاحیتوں کو سراہا اور دہشت گردی کے خلاف جنگ میں ان کی قربانیوں کا اعتراف کیا۔قبل ازیں میجر جنرل سعیدزودا بوبوجون عبدالقادر جب جوائنٹ اسٹاف ہیڈکوارٹرز پہنچے تو تینوں مسلح افواج کے چاق چوبند دستے نے انہیں گارڈ آف آنر پیش کیا۔