وزیراعظم نے پاکستان کے پہلے سکلز ایمپیکٹ بانڈ کی منظوری دیدی

اسلام آباد(اُردو پوائنٹ اخبارتازہ ترین - این این آئی۔ 25 جولائی2025ء)وزیراعظم شہباز شریف نے پاکستان کے پہلے سکلز ایمپیکٹ بانڈ کی منظوری دیتے ہوئے کہا ہے کہ یہ جدید ماڈل نوجوانوں کو روزگار کے قابل بنانے کیلئے نجی سرمایہ کاری کو راغب کرے گا،پاکستان کے باصلاحیت نوجوان پاکستان کا سب سے قیمتی اثاثہ ہیں،نوجوانوں کو روزگار کے قابل تعلیم و ہنر کی فراہمی سے اس ملک کی تقدیر بدلیں گے،پاکستان کے باصلاحیت نوجوان دنیا بھر میں پاکستان کا نام روشن کررہے ہیں،نوجوانوں کو پاکستان اور بیرون ملک روزگار کے مواقع اور حصول کی تعداد کے تخمینے پر مبنی ایک جامع روڈمیپ پیش کیا جائے،ہر دو ماہ میں اس پر عملدرآمد کی پیش رفت کا خود جائزہ لوں گا۔

جمعہ کو وزیر اعظم شہباز شریف کی زیر صدارت نوجوانوں کو روزگار کی فراہمی کے حوالے سے روڈ میپ پر جائزہ اجلاس اسلام آباد میں منعقد ہوا۔

(جاری ہے)

اجلاس میں وفاقی وزرا احد خان چیمہ، عطا اللہ تارڑ، چیئرمین وزیر اعظم یوتھ پروگرام رانا مشہود احمد خاں، رکن قومی اسمبلی آمنہ بتول اور متعلقہ اعلی حکام نے شرکت کی۔اس موقع پر وزیر اعظم نے کہا کہ اس نظام کے تحت نوجوانوں کو عصری تقاضوں سے ہم آہنگ ایسے ہنر سکھائے جائیں گے جس سے پاکستان کے نوجوان با اختیار اور ملکی اقتصادی ترقی میں اپنا اہم کردار ادا کر سکیں گے۔

وزیر اعظم نے ہدایت کی کہ نوجوانوں کی استعداد کار کو بڑھانے، عصری تقاضوں سے ہم آہنگ ہنر کی تربیت اور تربیت کے بعد روزگار یقینی بنانے کیلئے مزید اقدمات کئے جائیں۔انہوں نے کہا کہ وزیر اعظم یوتھ پروگرام، وزارت امور سمندر پار مقیم پاکستانی، نیوٹیک اور تمام متعلقہ اداروں کی نوجوانوں کو روزگار کی فراہمی کے حوالے سے اب تک کی کارکردگی اطمینان بخش ہے،پاکستانی نوجوانوں کو بیرون ملک روزگار کے حصول میں معاونت کیلئے ان ممالک کی مقامی زبانوں کی تعلیم کے مواقع فراہم کئے جائیں۔

وزیراعظم نے کہا کہ بیرون ملک روزگار کے حصول کیلئے ہنر مند افراد کی تیاری کو ترجیح دی جائے،نوجوانوں کو ڈیجیٹل یوتھ ہب پر موجود روزگار کے مواقع کے حوالے سے آگاہی فراہم کرنے کیلئے مہم چلائی جائے۔انہوں نے کہا کہ پاکستان کے باصلاحیت نوجوان پاکستان کا سب سے قیمتی اثاثہ ہیں،نوجوانوں کو روزگار کے قابل تعلیم و ہنر کی فراہمی سے اس ملک کی تقدیر بدلیں گے،پاکستان کے باصلاحیت نوجوان دنیا بھر میں پاکستان کا نام روشن کررہے ہیں۔

اجلاس کو بتایا گیا کہ وفاقی حکومت وزیر اعظم کی ہدایت پر نوجوانوں کو روزگار کے قابل بنانے کیلئے ہنر و تعلیم کی فراہمی کے ساتھ پاکستان و بیرون ملک روزگار کو یقینی بنانے کیلئے جامع اقدامات کر رہی ہے۔ اجلاس کو پروگرام کے تحت نوجوانوں کو پاکستان اور بیرون ملک روزگار کی فراہمی کا سالانہ تخمینہ بھی بتایا گیا۔ پروگرام نوجوانوں کو با اختیار بنا کر روزگار میں خودکفالت، آنٹرپرونیورشپ اور براہ راست نوکریوں کے حصول میں معاونت کر رہا ہے۔

اجلاس کو بتایا گیا کہ ڈیجیٹل یوتھ ہب کے تحت اب تک پانچ لاکھ سے زائد افراد رجسٹرڈ ہو چکے جبکہ 17 لاکھ سے زائد لوگوں نے اس کی ایپلی کیشن کو ڈائون لوڈ کیا۔5 سو سے زائد کمپنیاں رجسٹرڈ ہونے کے علاوہ پاکستان میں 47 ہزار سے زائد جبکہ ایک لاکھ سے زائد بیرون ملک روزگار کے مواقع اور 2 ہزار سے زائد سکالر شپس موجود ہیں۔ پورٹل سے بیرون ملک پاکستانی سفارتخانوں، سرکاری اداروں، نجی کمپنیوں اور بشمول اقوام متحدہ دیگر این جی اوز سمیت 5 سو سے زائد ادارے منسلک ہیں۔

اجلاس میں وزیر اعظم نے پاکستان کے پہلے سکلز ایمپیکٹ بانڈ کی منظوری بھی دی۔ اس نظام کے تحت نوجوانوں کو عصری تقاضوں سے ہم آہنگ ایسے ہنر سکھائے جائیں گے جس سے پاکستان کے نوجوان با اختیار اور ملکی اقتصادی ترقی میں اپنا اہم کردار ادا کر سکیں گے۔ اجلاس کو مزید بریفنگ میں بتایا گیا کہ اس ماڈل کو "پے فار سکسیس" کہا جاتا ہے جس کے تحت پبلک یا ڈونر فنڈز صرف اس وقت جاری کیے جاتے ہیں جب آزاد ذرائع سے تصدیق شدہ نتائج جیسے کہ ملازمت کے حصول یا آمدن کی مخصوص حد حاصل کر لی جائے۔ وزیر اعظم نے مقامی اور بین الاقوامی سطح پر نوجوانوں کو روزگار کی فراہمی کے حوالے سے تخمینے اور مکمل روڈ میپ فراہم کرنے کی ہدایت کی۔