خیبرپختونخوا‘ سی ٹی ڈی نے بریکوٹ میں فتنہ الخوارج کے 3 مطلوب دہشتگرد ہلاک کر دیے

ہفتہ 26 جولائی 2025 13:50

سوات (اُردو پوائنٹ اخبارتازہ ترین - این این آئی۔ 26 جولائی2025ء)محکمہ انسداد دہشت گردی (سی ٹی ڈی) سوات کو اہم کامیابی ملی ہے ،بریکوٹ میں فتنہ الخوارج کے 3 مطلوب دہشت گردوں کو ہلاک کر دیا گیا۔ سی ٹی ڈی نے فتنہ الخوارج کے 3 اہم کارندے ہلاک کردئیے، سی ٹی ڈی سوات کے کامیاب آپریشن میں اجمل عرف وقاص سمیت 3 دہشت گرد جہنم واصل ہوئے۔ولیج ڈیفنس کونسل کے ارکان کے قاتل اجمل کے سر کی قیمت 20 لاکھ مقرر تھی۔

سی ٹی ڈی نے اپنے بیان میں کہا کہ مارے جانے والے دہشت گرد سیکیورٹی فورسز پر حملوں، پولیس اہلکاروں کی شہادتوں میں ملوث تھے، بیرونی فنڈنگ سے دہشت گردی پھیلانے والا نیٹ ورک تباہ، دہشت گرد آئی ای ڈی حملوں اور بھتہ خوری کے مقدمات میں بھی مطلوب تھے۔سی ٹی ڈی کی یہ کارروائی سوات اور ملحقہ علاقوں میں فتنہ الخوارج کے آپریشنل ونگز پر کاری ضرب ہے، فتنہ الخوارج کو جڑ سے اکھاڑ پھینکنے کے لیے پر عزم ہیں۔

(جاری ہے)

آئی جی پی خیبرپختونخوا ذوالفقار حمید اور آر پی او مالاکنڈ ڈویژن شیر اکبر خان نے فتنہ الخوارج کے آپریشنل کمانڈ ونگ پر کاری ضرب لگانے پر علاقائی پولیس اور سی ٹی ڈی سوات کی تعریف کی ہے اور کہا کہ خیبرپختونخوا میں دیر پا امن و امان کے قیام کے لیے دہشت گردوں کے خلاف کارروائیوں کا سلسلہ مزید تیز کیا جائے گا۔دوسری جانب ہنگو میں کارروائی کے دوران پولیس اور ڈی پی او پر حملے میں ملوث دہشت گرد مارا گیا، اس دوران دہشت گردوں سے فائرنگ کے تبادلے میں پولیس کی گاڑی کو جزوی نقصان پہنچا۔

پولیس نے فالو اپ آپریشن کرتے ہوئے ہنگو میں پولیس اور ڈی پی او ہنگو پر حملے میں ملوث دہشت گرد کو ہلاک کیا۔پولیس حکام کے مطابق تھانہ دوآبہ کی حدود میں مطلوب دہشت گرد آپریشن کے دوران ہلاک ہوا، مقابلے میں پولیس کی گاڑی کو جزوی نقصان پہنچا ہے۔