پنجاب اسمبلی کے اجلاس کا ایجنڈا جاری کردیا گیا

صوبائی حکومت اہم بلوں کی منظوری لے گی، دیگر تحاریک بھی پیش ہونگی

ہفتہ 26 جولائی 2025 16:55

لاہور (اُردو پوائنٹ اخبارتازہ ترین - این این آئی۔ 26 جولائی2025ء) پنجاب اسمبلی کے 28جولائی بروز پیر کو ہونے والے اجلاس کا ایجنڈا جاری کردیا گیا، حکومت صوبائی اسمبلی میں اہم بلوں کی منظوری سمیت دیگر معاملات پر سوالات کے جواب دے گی۔پنجاب اسمبلی سیکریٹریٹ نے صوبائی اسمبلی کے اجلاس کا ایجنڈا جاری کردیا، اجلاس 2روز وقفے کے بعد 28جولائی پیر دوپہر 2 بجے ہوگا، جس میں حکومت اسمبلی سے اہم بلوں کی منظوری لے گی۔

رپورٹ کے مطابق پنجاب اسمبلی میں پنجاب کنٹرول آف نارکوٹک سبسٹینسز بل 2025، پنجاب آٹزم اسکول اینڈ ریسورس سینٹر بل 2025، پنجاب اربن پراپرٹی ٹیکس ترمیمی بل 2025 اور پنجاب زرعی آمدنی ٹیکس ترمیمی بل 2025 منظوری کیلئے پنجاب اسمبلی میں پیش کیے جائیں گے۔ذرائع کے مطابق صوبائی اسمبلی اجلاس میں محکمہ ایکسائز ٹیکسیشن اور منشیات سے متعلق سوالات کے جوابات دیئے جائیں گے، مختلف ارکان اسمبلی کے توجہ دلا نوٹسز بھی ایجنڈے میں شامل ہیں جبکہ راحیلہ خادم حسین کی قیمتوں کے کنٹرول سے متعلق تحریک التوا کار ایوان میں پیش ہوگی۔

(جاری ہے)

رپورٹ کے مطابق ندیم صادق ڈوگر کی مقامی حکومت سے متعلق تحریک التوا کار کا جواب ایوان میں پڑھا جائے گا، قاضی احمد سعید کی سروسز اینڈ جنرل ایڈمنسٹریشن سے متعلق تحریک اور امجد علی جاوید کی کوآپریٹو کے موضوع پر تحریک التوا کار بھی ایوان میں پیش کی جائے گی جبکہ پیپلز پارٹی کے علی حیدر گیلانی کی اسکول ایجوکیشن سے متعلق تحریک بھی پیش ہوگی۔