عالمی برادری کشمیری اسیران کی رہائی ، کشمیریوں کو حق خودارادیت دلانے کیلئے کردار اداکرے، مقررین

ہفتہ 26 جولائی 2025 23:00

میرپور (اُردو پوائنٹ اخبارتازہ ترین - این این آئی۔ 26 جولائی2025ء) بنیادی انسانی حقوق اور امن کے لیے کام کرنے والی غیر سرکاری تنظیم’’ پیس گروپ آف جرنلسٹس ‘‘کے زیر اہتمام آزادجموںوکشمیر کے شہر میر پور میں ’’اسیران ریاست جموں و کشمیر اور حق خودارادیت‘‘ کے عنوان سے ایک سیمینار کا انعقاد کیا گیا۔کشمیر میڈیاسروس کے مطابق سیمینار سے سابق چیف جسٹس آزاد جموںو کشمیر سپریم کورٹ راجہ اعظم ، پیس گروپ جرنلسٹس کے ایگزیکٹیو ڈائریکٹر سعید الرحمن صدیقی کل جماعتی حریت کانفرنس آزاد جموںوکشمیر شاخ کے رہنما محمود احمد ساغر، شیخ عبدالمتین، شمیم شال، رفیق احمد ڈار، الطاف احمد بٹ راجہ وسیم ایڈوکیٹ، محمد اسلم ملک، بشیر احمد شگوہ ،کشمیری صحافی رئیس میر ، عبد الرحمان اور دیگر نے کل جماعتی حریت کانفرنس کے چیئرمین مسرت عالم بٹ، شبیر احمد شاہ، محمد یاسین ملک، آسیہ اندرابی، ناہیدہ نسرین، فہمیدہ صوفی، نعیم احمد خان، ایاز محمد اکبر، شاہد الاسلام، معراج الدین کلول، پیر سیف اللہ، فاروق احمد ڈار، فہمیدہ صوفی، ناہیدہ نسرین، مشتاق الاسلام، مولوی بشیر احمد عرفانی، بلال صدیقی، امیر حمزہ، ظفر اکبر بٹ ،خرم پرویز سمیت بھارتی جیلوں میں بند ہزاروں کشمیریوں کی فوری رہائی کا مطالبہ کیا۔

(جاری ہے)

انہوں نے کہا کہ کشمیری عوام اپنے حق ِ خودارادیت کے لیے پرامن جدوجہد کر رہے ہیں، جسے اقوام متحدہ نے تسلیم کر رکھا ہے۔اس موقع پر ایک اعلامیہ بھی جاری کیا گیا جس میں عالمی برادری سے مطالبہ کیا گیا کہ وہ کشمیریوں کی آواز سنے ، بھارت کو بنیادی انسانی حقوق کی خلاف ورزیوں سے روکے اور کشمیریوں کو انکا پیدائشی حق ،حق خود ارادیت دلانے کیلئے کردار ادا کرے۔انہوں نے آپریشن بنیان مرصوص کی بھر پور کامیابی اور بھارت کے ناپاک عزائم ناکام بنانے پر پاک فوج کو بھر پور خراج تحسین پیش کیا۔