نادرا آزاد جموں و کشمیر میں انتخابی عمل کو شفاف بنانے کے لئے آزاد جمو ں وکشمیر الیکشن کمیشن سے بھر پور تعاون کریگا

بدھ 30 جولائی 2025 17:21

اسلام آباد(اُردو پوائنٹ اخبارتازہ ترین - این این آئی۔ 30 جولائی2025ء)نادرا آزاد جموں و کشمیر میں انتخابی عمل کو شفاف بنانے کے لئے آزاد جمو ں وکشمیر الیکشن کمیشن سے بھر پور تعاون کرے گا۔اس بات کی یقین دہانی آج یہاں چیئرمین نادرالیفٹینٹ جنرل محمد منیر افسر نے ممبر الیکشن کمیشن آزاد جموں وکشمیر سید نظیر الحسن گیلانی کیساتھ ملاقات میں کروائی۔

ممبر الیکشن کمیشن نے چیئرمین نادرا سے انتخابی عمل کی شفافیت کے لئے مہاجرین مقیم پاکستان کے قومی شناختی کارڈز میں ان کی کشمیر ی شناخت کے اندراج،انتخابی فہرستوں کی طباعت کے معاوضوں میں کمی،دونوں اداروں کے درمیان ایک مشترکہ ورکنگ گروپ کے قیام اور آزاد جموں وکشمیر الیکشن کمیشن کے ریکارڈ کے تحفظ اور کمیشن کی جانب سے پولنگ اسکیمز کے اجرا ء میں جدید انفارمیشن ٹیکنالوجی کے استعمال کے لئے نادرا کی معاونت اور اس ضمن میں کمیشن کے متعلقہ عملہ کی ضروری تربیت وغیرہ سے متعلقہ مختلف تجاویز پر تفصیلی تبادلہ خیال کیا۔

(جاری ہے)

چیئرمین نادرا نے آزاد جموں وکشمیر میں آزادانہ،منصفانہ اور غیر جانبدارانہ انتخابات کے انعقاد کے لئیالیکشن کمیشن کے عز م کو سراہتے ہوئے اس ضمن میں اپنے ادارے کے بھر پور تعاون کا یقین دلایا۔ملاقات میں سیکرٹری الیکشن کمیشن راجہ محمد شکیل خان اور سیکرٹری انفارمیشن ٹیکنالوجی راشد حنیف کے علاوہ نادرا کے اعلیٰ حکام بھی موجود تھے۔

اس موقع پر چیئرمین نادرا نے ممبر الیکشن کمیشن، سیکرٹری الیکشن کمیشن اور سیکرٹری انفارمیشن ٹیکنالوجی کو اپنے ادارہ کی جانب سے سونیئر بھی پیش کئے جبکہ ممبر الیکشن کمیشن نے الیکشن کمیشن آزاد جموںوکشمیر کی جانب سے چیئرمین نادرا اور چیف پراجیکٹ آفیسرنادرا کو اپنے ادارہ کی جانب سے سونیئر پیش کئے۔یہ بات ترجمان آزادجموں وکشمیر الیکشن کمیشن کی جانب سے جاری کردہ پریس ریلیز میں بتائی گئی۔