غازی ملت سردار ابراہیم خان کی برسی، بیرسٹر سلطان کا خراج تحسین

بدھ 30 جولائی 2025 18:58

اسلام آباد (اُردو پوائنٹ اخبارتازہ ترین - این این آئی۔ 30 جولائی2025ء)صدر ریاست آزاد جموں وکشمیر بیرسٹر سلطان محمود چوہدری نے غازی ملت سردار ابراہیم خان مرحوم کی بائیسویں برسی کے موقع پر اپنے ایک خصوصی پیغام میں کہا ہے کہ غازی ملت نہ صرف آزادکشمیر کے پہلے بانی صدر تھے بلکہ انہوں نے آزادکشمیر کی آزادی میں اہم کردار ادا کیا اور تحریک آزادی کشمیر کی قیادت بھی کی اور اقوام متحدہ میں بھی جا کر کشمیریوں کی نمائندگی کی اور اس خطے کو آزاد کرایا۔

24اکتوبر 1947کو آزادکشمیر میں بننے والی حکومت کی بنیاد رکھی اور آزادکشمیر کے پہلے صدر بنے۔ وہ نہ صرف آزادکشمیر کے پہلے بانی صدر ہیں بلکہ جب میں 1996سے 2001تک وزیر اعظم رہا تو وہ اُس وقت آزادکشمیر کے صدر تھے۔ اُس وقت آزادکشمیر کی چار حکومتیں تبدیل ہوئیں لیکن میں نے اُن کی قیادت میں اپنی حکومت کے پانچ سال مکمل کیے۔

(جاری ہے)

میں نے اُن کی رہنمائی میں آزادکشمیر کو خودکفیل بنانے کے لئے جاگراں ہائیڈرو پروجیکٹ بنوایا یہ آزادکشمیر کا پہلا اور آخری پراجیکٹ ہے جس سے کروڑوں کی آمدنی آزادکشمیر کے خزانے میں جا رہی ہے۔

اسی طرح کیڈٹ کالج پلندری، میرپور میں سوئی گیس، راولاکوٹ میں گوئیں نالہ روڈ اور کوٹلی میں رحمان برج اور بائی پاس، باغ میں ایک بڑے ایجوکیشن پیکج وویمن کالج اور کئی دوسرے تعلیمی اداروں کی بنیاد رکھی۔ اسی طرح باغ اور نیلم ڈویلپمنٹ اتھارٹی کا قیام عمل میں لایا اور بے شمار ترقیاتی کام کیے۔اس سارے کام کا کریڈٹ غازی ملت سردار ابراہیم خان مرحوم کو جاتا ہے اور اگر اس میں کوئی کمی اور کوتاہی رہ گئی تو اُس میں یہ ہماری وجہ سے تھی لیکن غازی ملت سردار محمد ابراہیم خان مرحوم کی وجہ سے ہم نے ریاست میں یادگار ترقیاتی کام کیے۔

اس موقع پر صدر ریاست آزاد جموں وکشمیر بیرسٹر سلطان محمود چوہدری نے اپنے پیغام میں مزید کہا کہ آج غازی ملت سردار محمد ابراہیم خان کی بائیسویں برسی کے موقع پرہم اس بات کی تجدید عہد کرتے ہیں کہ ہم آزادی کے بیس کیمپ سے مسئلہ کشمیر کو بین الاقوامی سطح پر اُٹھانے اور بھارت کی جانب سے مقبوضہ کشمیر میں جاری انسانی حقوق کی پامالی کو رکوانے اور مقبوضہ کشمیر کی آزادی تک اپنی جدوجہد جاری رکھیں گے۔